Испания миллий терма жамоаси сафида жаҳон ва Европа чемпионлигини қўлга киритган, «Барселона» билан ютиш мумкин бўлган барча совринларга эга чиққан афсонавий ҳимоячилардан бири Карлес Пуйоль 9 ноябрь куни Тошкентга ташриф буюради. Бу ҳақда ЎФФ матбуот хизмати хабар берди.
Пуйолнинг ташрифи ЎФФ ва ФИФА президентлари ўртасидаги учрашув ва ҳамкорлик самараси экани айтилган. Аввалроқ Халқаро Футбол Уюшмаси президенти Жанни Инфантино Ўзбекистон футболидаги ўзгаришларга хайрихоҳ эканлигини билдириб, жаҳон футболи юлдузларининг мамлакатга ташрифига кўмаклишни ваъда берганди.
Пуйоль Тошкентга ташрифи давомида футбол академияларига боради ва ёш футболчиларга мастер-класс ўтаб беради. Бунда унинг айнан қайси академияларда бўлиши ва Ўзбекистонга сафари неча кунга мўлжаллангани айтилмаган.
Аниқ томони, Карлес Пуйоль Олий Лига 28-туридан ўрин олган «Пахтакор» ва «Олмалиқ» клублари ўртасидаги беллашувни стадионнинг ўзидан томоша қилади. Қайд этиш керак, ЎФФ президенти халқаро сафарларга «Пахтакор» президенти Бобур Шодиев билан боради. Инфантино билан учрашув ҳам бундан мустасно бўлмаганди.
Карлес Пуйоль 2008 йил «Бунёдкор» раҳбарияти таклифига кўра ҳам Тошкентга келганди. Бунда ҳимоячига Андрес Иньеста ва Сеск Фабрегас ҳамроҳлик қилган. «Бунёдкор» сабаб Тошкентда, шунингдек, Самуэл Это’O, Криштиану Роналду, Лионель Месси каби машҳурлар ҳам айнан 2008 йил меҳмон бўлганди.
Изоҳ (0)