Qirg‘iziston bosh vaziri o‘rinbosarining yordamchisi, uning haydovchisi, shuningdek, vazir o‘rinbosarining o‘zi — Temir Jumaqodirov Qirg‘iziston shimolida sodir bo‘lgan YTH oqibatida halok bo‘ldi. Bu haqda Qirg‘iziston Vazirlar Mahkamasiga asoslanib, “TASS” xabar berdi.
Bishkek — Qorabolta trassasi bo‘ylab harakatlangan Jumaqodirovning xizmat avtomobili “KamAZ” rusumli yuk mashinasi bilan to‘qnashgan.
Ayni vaqtda ushbu yo‘l-transport hodisasining barcha tafsilotlari o‘rganilmoqda.
Qirg‘iziston IIV matbuot kotibi Bakit Seyitovning ma’lum qilishicha, vazirlik bosh vazir o‘rinbosarining o‘limi yuzasidan jinoyat ishini ochadi.
Agentlik ma’lumotlariga ko‘ra, yuk mashinasi haydovchisi shifoxonaga yotqizilgan.
Temir Jumaqodirov hukumatda xavfsizlik masalalariga javob bergan va 15-oktabrga belgilangan prezidentlik sayloviga tayyorgarlik ko‘rish va o‘tkazish respublika shtabiga rahbarlik qilgan. U 26-avgustda ushbu lavozimga tayinlangan edi. Jumaqodirov Talas shahridagi saylov uchastkalarining saylovga tayyorligini tekshirish uchun ketayotgan edi.
Izoh (0)