AQSh prezidentining rafiqasi Melaniya Tramp o‘tgan dam olish kunlari birinchi xonim sifatidagi ilk xorijiy safarini amalga oshirdi. Bu haqda “TASS” xabar bermoqda.
Melaniya Kanadaning Toronto shahrida nogiron harbiy xizmatchilarning “Taslim bo‘lmaganlar o‘yini” xalqaro musobaqalarida ishtirok etadigan AQSh delegatsiyasiga boshchilik qildi.
Unga AQSh Davlat kotibining birinchi o‘rinbosari Jon Sallivan va faxriylar ishi bo‘yicha vazir Devid Shulkin hamrohlik qildi. O‘yinlarda jami 100 nafarga yaqin amerikalik qatnashdi.
Birinchi xonim 2014-yildan beri har yili o‘tkazib kelinayotgan mazkur musobaqa tashabbuskori, Buyuk Britaniya shahzodasi Garri va Kanada bosh vaziri Jastin Tryudo bilan uchrashdi. AQSh jamoasi a’zolarini qo‘llab-quvvatladi.
AQSh prezidenti Donald Tramp Twitter’da rafiqasining Kanadadagi uchrashuvlari fotosini joylashtirdi va “Birinchi xonim bilan juda faxrlanaman. U chindan ham mamlakatimizning ajoyib vakili”, deya izoh qoldirdi.
Izoh (0)