KXDR sudi Janubiy koreyalik ikki nafar jurnalistga sirtdan o‘lim hukmini o‘qidi

KXDR markaziy sudi “Tona ilbo” hamda “Choson ilbo” gazetalarida ishlovchi ikki nafar Janubiy koreyalik jurnalistga sirtdan o‘lim hukmini o‘qidi. Bunga ular tomonidan KXDRda kapitalistik tizim elementlari haqidagi kitob borasida chiqargan maqolalari sabab bo‘lgan. Bu haqda KCNA agentligiga tayanib, “TASS” xabar berdi.

Ta’kidlanishicha, ko‘rsatilgan shaxslar apellyatsiya bera olmaydi, “qo‘shimcha tartiblarsiz jazo istalgan vaqtda va istalgan joyda darhol amalga oshiriladi”. Shuningdek, xabarda aytilishicha, “yuqoridagi gazetalar North Korea Confidential kitobidan iqtiboslar keltirib KXDR sha’nini haqorat qilgan”.

Gap Shimoliy koreyalik qochoqlardan olingan intervyular asosida ikki nafar britaniyalik jurnalistlar tomonidan yozilgan kitob haqida ketmoqda. Unda bozor iqtisodiyoti o‘sayotgan mamlakat hayoti va Janubiy Koreya musiqasi, seriallari hamda filmlarini pulga sotib olish mumkinligi haqida so‘z borgan.

Ushbu kitob Janubiy Koreyada “Koreya Kapitalistik Respublikasi” nomi ostida chiqqan bo‘lib, muqovasida mamlakatning rasmiy nomi ustidan kulingan, shuningdek, KXDR gerbiga parodiya shaklda illyustratsiya ishlangan.

Agentlik ma’lumotiga ko‘ra, Janubiy Koreya OAVlari “mamlakatning rasmiy nomi hamda muqaddas bo‘lgan davlat gerbini masxara qilgan”. Bu esa KXDR jinoyat kodeksiga ko‘ra, o‘lim hukmi bilan jazolanadi.