КХДР марказий суди «Тона ильбо» ҳамда «Чосон ильбо» газеталарида ишловчи икки нафар Жанубий кореялик журналистга сиртдан ўлим ҳукмини ўқиди. Бунга улар томонидан КХДРда капиталистик тизим элементлари ҳақидаги китоб борасида чиқарган мақолалари сабаб бўлган. Бу ҳақда KCNA агентлигига таяниб, «ТАСС» хабар берди.
Таъкидланишича, кўрсатилган шахслар апелляция бера олмайди, «қўшимча тартибларсиз жазо исталган вақтда ва исталган жойда дарҳол амалга оширилади». Шунингдек, хабарда айтилишича, «юқоридаги газеталар North Korea Confidential китобидан иқтибослар келтириб КХДР шаънини ҳақорат қилган».
Гап Шимолий кореялик қочоқлардан олинган интервьюлар асосида икки нафар британиялик журналистлар томонидан ёзилган китоб ҳақида кетмоқда. Унда бозор иқтисодиёти ўсаётган мамлакат ҳаёти ва Жанубий Корея мусиқаси, сериаллари ҳамда фильмларини пулга сотиб олиш мумкинлиги ҳақида сўз борган.
Ушбу китоб Жанубий Кореяда «Корея Капиталистик Республикаси» номи остида чиққан бўлиб, муқовасида мамлакатнинг расмий номи устидан кулинган, шунингдек, КХДР гербига пародия шаклда иллюстрация ишланган.
Агентлик маълумотига кўра, Жанубий Корея ОАВлари «мамлакатнинг расмий номи ҳамда муқаддас бўлган давлат гербини масхара қилган». Бу эса КХДР жиноят кодексига кўра, ўлим ҳукми билан жазоланади.
Изоҳ (0)