Gamburgda davom etayotgan boks bo‘yicha Jahon chempionatining chorak finaliga o‘zbekistonlik to‘rt sportchi yo‘llanma oldi. Bunga qadar Murod Ahmadaliyev birinchi jangidayoq qozog‘istonlik bokschidan yengilib, mundial bilan xayrlashgandi.
Sanjar Tursunov
JChdagi ilk jangini 5:0 hisobidagi g‘alaba bilan yakunlagan Sanjar Tursunov, ikkinchi jangida argentinalik Yara Peraltani taslim qildi — 4:1. Peralta -91 kilogramm vazn toifasidagi bokschilar musobaqasida 4-raqam ostida saralangandi.
Yarim final yo‘lida Tursunov gollandiyalik Roy Korvingga qarshi ringga chiqadi. Mazkur bokschi o‘z vazn toifasida 5-raqam ostida saralangan.
Sanjar Tursunov Toshkentda o‘tgan Osiyo chempionatida aynan chorak finalda mag‘lub bo‘lib, O‘zbekiston delegatsiyasining medalsiz qolgan yagona vakili bo‘lib qolgandi. Shunga qaramay u pley-off bosqichida zafar quchib, JChga qadar yetib kelgandi.
Iqbol Xoldorov
20 yoshli Iqbol Xoldorov mundiallarda debyut qildi. U o‘zining ilk jangida kolumbiyalik Jon Gutyeres bilan bellashdi va 5:0 hisobida zafar quchdi. Shu tariqa Osiyo chempioni sifatida Gamburgga tashrif buyurgan Xoldorov chorak finalga yo‘l oldi.
Gutyeres ilk bosqichda polshalik raqibini yengishga muvaffaq bo‘lgandi. Iqbolga qarshi jangning 2-raundida hakam unga nisbatan hisob ochishga majbur bo‘ldi. Bokschi jangni davom ettirgan bo‘lsa-da, 3-raundda ham baribir hech narsa qila olmadi.
Chorak finalda o‘zbekistonlik sportchining raqibi germaniyalik Artyom Xarutyunyan bo‘ladi. U -64 kilogramm vazn toifasidagi sportchilar orasida 4-raqam ostida saralangan. Iqbol bu borada 5-sportchi edi.Hasanboy Do‘stmatov
Rio Olimpiadasi chempioni Hasanboy Do‘stmatov chorak finalga yo‘l oldi. U o‘zining ilk jangini Kosta-Rika termasi a’zosi Robinson Rodrigesga qarshi o‘tkazib, 5:0 hisobida zafar quchdi.
Eng yengil — 49 kilogrammgacha bo‘lgan sportchilar o‘rtasidagi bellashuvlarda Hasanboy 2-raqam ostida saralangan. Uning chorak finaldagi raqibi hindistonlik Amit bo‘ladi.Isroil Madrimov
Isroil Madrimov Jahon chempionatidagi birinchi jangini nokaut bilan yakunladi. -75 kilogramm vazn toifasida O‘zbekiston sharafini himoya qilayotgan Isroilga turkmanistonlik Aziz Achilov raqib bo‘ldi.
Qo‘shni respublika sportchisi jang davomida uch marta nokdaun holatiga tushib qoldi. Shu tariqa hakamlar bellashuvni muddatidan avval to‘xtatishga qaror qildi va Madrimov ham chorak finalga yo‘l oldi.
Izoh (0)