Гамбургда давом этаётган бокс бўйича Жаҳон чемпионатининг чорак финалига ўзбекистонлик тўрт спортчи йўлланма олди. Бунга қадар Мурод Аҳмадалиев биринчи жангидаёқ қозоғистонлик боксчидан енгилиб, мундиал билан хайрлашганди.
Санжар Турсунов
ЖЧдаги илк жангини 5:0 ҳисобидаги ғалаба билан якунлаган Санжар Турсунов, иккинчи жангида аргентиналик Яра Пералтани таслим қилди — 4:1. Пералта -91 килограмм вазн тоифасидаги боксчилар мусобақасида 4-рақам остида сараланганди.
Ярим финал йўлида Турсунов голландиялик Рой Корвингга қарши рингга чиқади. Мазкур боксчи ўз вазн тоифасида 5-рақам остида сараланган.
Санжар Турсунов Тошкентда ўтган Осиё чемпионатида айнан чорак финалда мағлуб бўлиб, Ўзбекистон делегациясининг медалсиз қолган ягона вакили бўлиб қолганди. Шунга қарамай у плей-офф босқичида зафар қучиб, ЖЧга қадар етиб келганди.
Иқбол Холдоров
20 ёшли Иқбол Холдоров мундиалларда дебют қилди. У ўзининг илк жангида колумбиялик Жон Гутьерес билан беллашди ва 5:0 ҳисобида зафар қучди. Шу тариқа Осиё чемпиони сифатида Гамбургга ташриф буюрган Холдоров чорак финалга йўл олди.
Гутьерес илк босқичда польшалик рақибини енгишга муваффақ бўлганди. Иқболга қарши жангнинг 2-раундида ҳакам унга нисбатан ҳисоб очишга мажбур бўлди. Боксчи жангни давом эттирган бўлса-да, 3-раундда ҳам барибир ҳеч нарса қила олмади.
Чорак финалда ўзбекистонлик спортчининг рақиби германиялик Артём Харутюнян бўлади. У -64 килограмм вазн тоифасидаги спортчилар орасида 4-рақам остида сараланган. Иқбол бу борада 5-спортчи эди.Ҳасанбой Дўстматов
Рио Олимпиадаси чемпиони Ҳасанбой Дўстматов чорак финалга йўл олди. У ўзининг илк жангини Коста-Рика термаси аъзоси Робинсон Родригесга қарши ўтказиб, 5:0 ҳисобида зафар қучди.
Энг енгил — 49 килограммгача бўлган спортчилар ўртасидаги беллашувларда Ҳасанбой 2-рақам остида сараланган. Унинг чорак финалдаги рақиби ҳиндистонлик Амит бўлади.Исроил Мадримов
Исроил Мадримов Жаҳон чемпионатидаги биринчи жангини нокаут билан якунлади. -75 килограмм вазн тоифасида Ўзбекистон шарафини ҳимоя қилаётган Исроилга туркманистонлик Азиз Ачилов рақиб бўлди.
Қўшни республика спортчиси жанг давомида уч марта нокдаун ҳолатига тушиб қолди. Шу тариқа ҳакамлар беллашувни муддатидан аввал тўхтатишга қарор қилди ва Мадримов ҳам чорак финалга йўл олди.
Изоҳ (0)