O‘zbekiston iqtisodiyotida defolt bo‘lmaydi, mamlakatning oltin-valyuta zaxiralari pul-kredit siyosati bo‘yicha o‘tkaziladigan islohotlarni amalga oshirish uchun yetarli. Bu haqda Xalqaro press-klubning 26-iyulda bo‘lib o‘tgan yig‘ilishida Markaziy bank raisi o‘rinbosari Saidkamol Xo‘jayev ma’lum qildi.
“Zaxiralarimiz yetarli. Buni hammamiz bilamiz. Xalqaro valyuta jamg‘armasi ham O‘zbekistonning zaxiralari islohotlar o‘tkazish uchun yetarli ekanligini aytib o‘tdi. Demak, O‘zbekistonda defolt haqida gap bo‘lishi mumkin emas”, — dedi Markaziy bank raisi o‘rinbosari.
Yig‘ilishda ishtirok etgan O‘zbekiston moliya vaziri o‘rinbosari Mubin Mirzayev bu masalaga to‘xtalib, valyuta bozorini erkinlashtirish paytida davlat budjetida yetarlicha zaxira shakllantirilishi va uning ijrosi balanslangan holda ta’minlanishini qayd etib o‘tdi.
Mubin Mirzayev oltin-valyuta zaxiralarining yetarli ekanligini ta‘kidlagan holda, valyuta bozorini erkinlashtirish jarayonida hech qanday xalqaro moliyaviy institutlardan kredit olinmasligini aytib o‘tdi.
Ta’kidlanishicha, zaxiralar ikki yillik import uchun yetarli bo‘lib, qariyb 25 milliard dollarga yaqin. Shuning uchun hech qanday xalqaro kreditlarni jalb qilishga hojat yo‘q.
Izoh (0)