Bugun 20-iyul kuni Toshkent shahridagi Inha universitetiga (IUT) 2017—2018-yillar o‘quv yili uchun kirish imtihonlari bo‘lib o‘tmoqda. Avvalroq, xabar berilganidek Inha universitetiga bu yil kirish imtihonlari jarayonlarini bevosita kuzatishlari uchun ommaviy axborot vositalari vakillari taklif etildi va ular uchun to‘liq imkoniyat yaratildi. Bu esa o‘tkazilayotgan imtihonlarning shaffofligi hamda ochiqligini ta’minlashga xizmat qiladi.
IUT’ga hujjatlarni qabul qilish 2017-yilning 17-aprelidan 10-iyuliga qadar davom etdi. Abituriyentlar hujjatlarni onlayn rejimda yoki universitet binosiga kelib topshirishlari mumkin edi.
Yoshlarga qulaylik yaratish maqsadida IUT abituriyentlardan hujjat qabul qilishning yangi onlayn tizimini ishlab chiqdi. Mazkur tizim viloyatlardagi abituriyentlarga Toshkentga kelib o‘tirmasdan, hujjat topshirish imkonini yaratdi. Bundan tashqari abituriyentlar SMS-xabarnoma orqali qabul jarayonidagi barcha yangiliklardan boxabar bo‘lib turishdi.
Mazkur vaqt oralig‘ida IUT’ga 2490 nafar abituriyentlar onlayn ro‘yxatdan o‘tdi, lekin ulardan 1358 nafarigina barcha talablarga to‘liq javob berdi (IELTS ballari 5 dan kam bo‘lmasligi lozim). Ularning 920 nafari “Kompyuter va dasturiy injiniring” yo‘nalishi bo‘yicha o‘qish istagini bildirgan bo‘lsa, 438 nafar abituriyentlar esa “Logistika” yo‘nalishini tanladi. Joriy yilda universitet 400 nafar talabani qabul qilishni rejalashtirgan.
IUT’ga kirish imtihonlari Toshkentdagi “O‘zko‘rgazmasavdo” AJ binosida bo‘lib o‘tdi. 20-iyul kuni “Kompyuter va dasturiy injiniring” yo‘nalishi bo‘yicha imtihonlar o‘tayotgan bo‘lsa, 21-iyul kuni “Logistika” yo‘nalishi bo‘yicha imtihonlar bo‘lib o‘tadi.
Imtihon savollari Koreya Respublikasidagi Inha universiteti professorlari tomonidan tayyorlangan bo‘lib, savolnomalar Koreyadan yopiq konvertlarda keltirildi va ular bevosita imtihon olinayotgan zalda koreyalik ekspertlar tomonidan ochildi hamda abituriyentlarga tarqatildi.
Abituriyentlar fizika hamda matematika fanlaridan 20 tadan tuzilgan savollarga javob yozishlari lozim. O‘qishga qabul qilinganlar ichidan eng yuqori ball to‘plagan 10 nafar talabaga universitet homiylari tomonidan ularning kontrakt pulari to‘lab beriladi.
Kirish imtihonlarini o‘tkazish jarayonini optimallashtirish maqsadida OMR Card System (optik belgilarni tanish) tizimi joriy etildi.
Imtihon yakunlanishi bilan abituriyentlarning javoblari o‘rin olgan barcha savolnomalarni koreyalik mutaxassislar yig‘ib olishdi va baholash uchun o‘zlari bilan Koreyaga olib ketishadi. Imtihon natijalari 9-avgust kuni e’lon qilinadi.
Shuningdek, istalgan odam IUT kirish imtihonlarini live.inha.uz sahifasi orqali onlayn kuzatish imkoniyatiga ega.
Izoh (0)