Бугун 20 июль куни Тошкент шаҳридаги Инҳа университетига (IUT) 2017—2018 йиллар ўқув йили учун кириш имтиҳонлари бўлиб ўтмоқда. Аввалроқ, хабар берилганидек Инҳа университетига бу йил кириш имтиҳонлари жараёнларини бевосита кузатишлари учун оммавий ахборот воситалари вакиллари таклиф этилди ва улар учун тўлиқ имконият яратилди. Бу эса ўтказилаётган имтиҳонларнинг шаффофлиги ҳамда очиқлигини таъминлашга хизмат қилади.
IUT’га ҳужжатларни қабул қилиш 2017 йилнинг 17 апрелидан 10 июлига қадар давом этди. Абитуриентлар ҳужжатларни онлайн режимда ёки университет биносига келиб топширишлари мумкин эди.
Ёшларга қулайлик яратиш мақсадида IUT абитуриентлардан ҳужжат қабул қилишнинг янги онлайн тизимини ишлаб чиқди. Мазкур тизим вилоятлардаги абитуриентларга Тошкентга келиб ўтирмасдан, ҳужжат топшириш имконини яратди. Бундан ташқари абитуриентлар SMS-хабарнома орқали қабул жараёнидаги барча янгиликлардан бохабар бўлиб туришди.
Мазкур вақт оралиғида IUT’га 2490 нафар абитуриентлар онлайн рўйхатдан ўтди, лекин улардан 1358 нафаригина барча талабларга тўлиқ жавоб берди (IELTS баллари 5 дан кам бўлмаслиги лозим). Уларнинг 920 нафари «Компютер ва дастурий инжиниринг» йўналиши бўйича ўқиш истагини билдирган бўлса, 438 нафар абитуриентлар эса «Логистика» йўналишини танлади. Жорий йилда университет 400 нафар талабани қабул қилишни режалаштирган.
IUT’га кириш имтиҳонлари Тошкентдаги «Ўзкўргазмасавдо» АЖ биносида бўлиб ўтди. 20 июль куни «Компьютер ва дастурий инжиниринг» йўналиши бўйича имтиҳонлар ўтаётган бўлса, 21 июль куни «Логистика» йўналиши бўйича имтиҳонлар бўлиб ўтади.
Имтиҳон саволлари Корея Республикасидаги Инҳа университети профессорлари томонидан тайёрланган бўлиб, саволномалар Кореядан ёпиқ конвертларда келтирилди ва улар бевосита имтиҳон олинаётган залда кореялик экспертлар томонидан очилди ҳамда абитуриентларга тарқатилди.
Абитуриентлар физика ҳамда математика фанларидан 20 тадан тузилган саволларга жавоб ёзишлари лозим. Ўқишга қабул қилинганлар ичидан энг юқори балл тўплаган 10 нафар талабага университет ҳомийлари томонидан уларнинг контракт пулари тўлаб берилади.
Кириш имтиҳонларини ўтказиш жараёнини оптималлаштириш мақсадида ОМR Cаrd Сystem (оптик белгиларни таниш) тизими жорий этилди.
Имтиҳон якунланиши билан абитуриентларнинг жавоблари ўрин олган барча саволномаларни кореялик мутахассислар йиғиб олишди ва баҳолаш учун ўзлари билан Кореяга олиб кетишади. Имтиҳон натижалари 9 август куни эълон қилинади.
Шунингдек, исталган одам IUT кириш имтиҳонларини live.inha.uz саҳифаси орқали онлайн кузатиш имкониятига эга.
Изоҳ (0)