“O‘zbekiston havo yo‘llari” Toshkent—Bishkek yo‘nalishidagi reyslar sonini 2 marotaba ko‘paytirib, haftasiga 4 taga yetkazadi. Bu haqda Qirg‘iziston transport va yo‘llar vaziri o‘rinbosari Gulmira Abdraliyeva Toshkentda, “Davavianazorat”dagi uchrashuvda ma’lum qildi, deya xabar beradi UZ24.
Qirg‘iz tomoni o‘zbek havo kemalariga xizmat ko‘rsatishda imtiyozli sharoitlar taklif etdi. Shuningdek, “O‘zbekiston havo yo‘llari”ga “Manas” aeroporti orqali Yevosiyo iqtisodiy ittifoqi, AQSh va Janubi—Sharqiy Osiyo mamlakatlariga tranzit parvozlariga erkinlikning beshinchi darajasini taqdim etishga tayyorlik bildirildi.
Qirg‘iziston delegatsiyasi Toshkent—Issiqko‘l—Toshkent yo‘nalishi bo‘yicha charter reyslari qayta tiklangani uchun O‘zbekiston hukumatiga o‘z minnatdorligini izhor etdi.
Qayd etish joizki, Toshkentga tashrif O‘zbekiston va Qirg‘iziston aviatsiya rasmiylarining oxirgi 9 yil mobaynidagi ilk uchrashuvi bo‘ldi.
Izoh (0)