“Turkiyada 2016-yil 15-iyulda bo‘lib o‘tgan davlat to‘ntarishiga urinishda xalqaro kuchlarning qo‘li bor, biroq biz ularning kimligini aniq bilmaymiz”, — dedi Turkiya adolat va taraqqiyot partiyasi spikeri va partiya raisining o‘rinbosari Mohir Unal jurnalistlar oldida qilgan chiqishida. Bu haqda "Daryo" muxbiri ma'lum qildi.
Davlat to‘ntarishiga urinishning bir yilligi munosabati bilan mahalliy va xorijiy jurnalistlar uchun tashkil etilgan media safar doirasida chiqish qilgan partiya spikeri davlat to‘ntarishini tashkil qilgan Fathulloh Gulen boshchiligidagi tashkilotning xalqaro miqyosda xavf-xatarni yuzaga keltirishi mumkinligini ta’kidlab o‘tdi.
Mohir Unalning aytishicha, Fathulloh Gulenning FETO tashkiloti 2013-yildan boshlab kuzatuvga olingan. “Biz ularda qurolli kuchlar borligini ham bilganmiz”, — dedi partiya spikeri.
Turkiyadagi favqulodda holatning uzoqqa cho‘zilishi sababini tushuntirar ekan, mamlakatning ayni vaqtda to‘rtta tashkilot — IShID, FETO, Kurdiston ishchi partiyasi va Inqilobiy xalq ozodligi front partiyasiga qarshi kurashayotganini ta’kilab o‘tdi. Shuningek, u “Turkiya terroristik tashkilotlarning nishonlaridan biri”, — deb o‘z so‘ziga izoh berdi.
FETOning davlat tashkilotlaridagi a’zolari haqida gapirar ekan, Mohir Unal ularning yashirin kanallar orqali aloqa qilganini qo‘shimcha qildi.
Izoh (0)