«Туркияда 2016 йил 15 июлда бўлиб ўтган давлат тўнтаришига уринишда халқаро кучларнинг қўли бор, бироқ биз уларнинг кимлигини аниқ билмаймиз», — деди Туркия адолат ва тараққиёт партияси спикери ва партия раисининг ўринбосари Моҳир Унал журналистлар олдида қилган чиқишида. Бу ҳақда "Дарё" мухбири маълум қилди.
Давлат тўнтаришига уринишнинг бир йиллиги муносабати билан маҳаллий ва хорижий журналистлар учун ташкил этилган медиа сафар доирасида чиқиш қилган партия спикери давлат тўнтаришини ташкил қилган Фатҳуллоҳ Гулен бошчилигидаги ташкилотнинг халқаро миқёсда хавф-хатарни юзага келтириши мумкинлигини таъкидлаб ўтди.
Моҳир Уналнинг айтишича, Фатҳуллоҳ Гуленнинг FETO ташкилоти 2013 йилдан бошлаб кузатувга олинган. «Биз уларда қуролли кучлар борлигини ҳам билганмиз», — деди партия спикери.
Туркиядаги фавқулодда ҳолатнинг узоққа чўзилиши сабабини тушунтирар экан, мамлакатнинг айни вақтда тўртта ташкилот — ИШИД, FETO, Курдистон ишчи партияси ва Инқилобий халқ озодлиги фронт партиясига қарши курашаётганини таъкилаб ўтди. Шунингек, у «Туркия террористик ташкилотларнинг нишонларидан бири», — деб ўз сўзига изоҳ берди.
FETO'нинг давлат ташкилотларидаги аъзолари ҳақида гапирар экан, Моҳир Унал уларнинг яширин каналлар орқали алоқа қилганини қўшимча қилди.
Изоҳ (0)