Qoraqalpog‘iston Respublikasi bojxona boshqarmasi xodimlari ayrim fuqarolar tomonidan o‘qotar qurollarning noqonuniy saqlanishiga doir qonunbuzarlik holatlarini fosh qilindi, deb xabar berdi Qoraqalpog‘iston Respublikasi bojxona boshqarmasi axborot xizmati.
Xususan, fuqaro J.Tajimuratovning (barcha ism-shariflar o‘zgartirilgan) yashash xonadoni amaldagi tartiblarga binoan va xolislar ishtirokida ko‘zdan kechirilganda, xonadonining xo‘jalik tomorqasiga eski kiygizga o‘ralgan holda 1 dona bir stvolli ov miltig‘i, 2 dona patron va 38 dona gilzalar ko‘mib qo‘yilganligi fosh qilindi, Shuningdek, Qo‘ng‘irot tumanida o‘tkazilgan tezkor tadbir davomida yana bir fuqaro O.Azamatovning ham yashash xonadonidan 1 dona bir stvolli ov miltig‘i va 3 dona gilzalar yashirin ravishda saqlanayotganligi aniqlangan.
Kegeyli tumanida istiqomat qiluvchi fuqaro A.Mambetovning xonadonini ko‘zdan kechirish paytida topilgan 1 dona ikki stvolli ov miltig‘ining ham hech qanday hujjati bo‘lmagan.
Mazkur holatlar yuzasidani jinoiy ishlar qo‘zg‘atildi hamda sud tomonidan tegishli jazo choralari ko‘rildi.
Joriy yilning o‘tgan davri mobaynida Qoraqalpog‘iston Respublikasi bojxona boshqarmasi tomonidan huquqni muhofaza qiluvchi boshqa idora xodimlari bilan hamkorlikda olib borilgan chora-tadbirlar natijasida qurol-yarog‘ va o‘q-dorilarni bojxona chegaralari orqali noqonuniy ravishda olib o‘tish, bu kabi sovuq qurollarni tegishli ruxsatnomalarsiz o‘z xonadonlarida saqlash bilan bog‘liq bir nechta qonunbuzarlik holatlari fosh qilindi.
Natijada 6 ta o‘q otar qurol, 11 dona o‘q, 103 dona gilza, 10 kilogramm drob, 1324 dona kapsula, 26 gramm porox, 496 dona pnevmatik patronlar, 912 dona pnevmatik o‘qlar kapsulasi, 10 dona elektroshokerlar daliliy ashyo tariqasida olib qo‘yildi.
Izoh (0)