Namangan shahar hokimi etib tayinlangan Shavkatjon Abdurazzoqov faoliyatini mahallalardagi vaziyatni shaxsan o‘rganishdan boshladi. Bu haqda shahar hokimligi axborot xizmatiga tayanib, “Daryo” muxbiri xabar bermoqda.
Hokim “Chamanzor” mahallasida bo‘lib, o‘ndan ortiq xonadon egalari bilan suhbatlashdi. Unga kommunal xizmat, sog‘liqni saqlash, ta’lim, bank, soliq, moliya, bandlikka ko‘maklashish, kadastr idoralari, “Mahalla” jamg‘armasi va Yoshlar ittifoqi shahar kengashi vakillari hamrohlik qildi.
Asalarichilik bilan shug‘ullanuvchi Jobir Holiqovning kredit borasida murojaati joyning o‘zida ko‘rib chiqilib, Xalq bankiga imtiyozli kredit ajratish vazifasi topshirildi. Xonadonini kadastr qilish borasida byurokratik to‘siqlarga uchrayotgan Roziqjon Sattarovning muammoasi shahar kadastr idorasi vakili tomonidan hal etildi.
Matluba Zokirova va Munavvar Inamovalarning oilalariga 20 tadan parranda bir oylik ozuqasi bilan topshirildi. Shuningdek, aholining elektr energiya ustunini o‘rnatish, kanalizatsiya muammosini hal qilish borasidagi murojaatlari yuzasidan aniq topshiriqlar berildi.
Hokim xonadonlarni o‘rganayotgan paytda unga ish so‘rab murojaat qilgan Xayrullo Yusupov va Faxriddin Abdullayev esa ish bilan ta’minlandi.
Xuddi shunday tadbirlar bir paytning o‘zida shaharning “Zarkent”, “Madaniy maorif” va “Ishonch” mahallarida shahar prokurori, IIB va DSI rahbarlari tomonidan amalga oshirildi. Ertalabdan to kunning birinchi yarmigacha 4 ta guruh tomonidan jami 300 dan oshiq murojaatning ijobiy yechimi topildi.
Izoh (0)