Yangi o‘quv yiligacha 11 yillik ta’lim bo‘yicha darsliklar masalasi hal qilinadi

“Bugungi kunda 11 yillik ta’limga o‘tish borasida tayyorgarlik ishlari olib borilmoqda. Ishchi guruhlar tomonidan maktablarda kasb-hunar o‘rgatish ishlari bo‘yicha o‘rganish ishlari davom ettirilmoqda”, — deb 11 yillik ta’lim yuzasidan Xalqaro press-klubning 7-iyulda bo‘lib o‘tgan sessiyasida berilgan savolga Xalq ta’limi vazirligi boshqarma boshlig‘i Hikmatilla Daminov javob berdi.

Yangi o‘quv yiliga qadar 10-sinfda o‘qishni davom ettiruvchi o‘quvchilar uchun darsliklar va o‘quv-uslubiy qo‘llanmalarni tayyorlash ishlari ishchi guruhlar tomonidan yakunlanadi.

Hikmatilla Daminov, Xalq ta’limi vazirligi boshqarma boshlig‘i

Shuningdek, bu masala yuzasidan davlat rahbari tomonidan 30-iyunda 20 kunlik muddat ichida hukumat qarori loyihasini tayyorlash topshirig‘i berilgani va ayni vaqtda qaror loyihasi ustida ish olib borilayotgani ta’kidlab o‘tildi.

Maktablardagi sinflarda o‘quvchilar sonining juda ko‘payib ketishi yuzasidan berilgan savolga javob bergan vazirlik vakili yangi tahrirda tasdiqlangan umumiy o‘rta ta’lim to‘g‘risidagi nizomga asosan, maktablardagi sharoitlardan kelib chiqib sinflardagi o‘quvchilar soni 35 nafargacha etib belgilanganini aytib o‘tdi.