Samsung Galaxy Note 7 smartfoning qayta ishlangan versiyasi ishlab chiqaruvchilar tomonidan rasman taqdim etildi va sotuvga chiqarishga tayyorgarlik ko‘rilmoqda, deb xabar berdi “Hi-tech.mail.ru”.
Qanday o‘zgarishlar bo‘ldi?
Qayta ishlangan qurilmaning alohida e’tiborga molik jihatlaridan biri bu uning akkumulyatori. Yodingizda bo‘lsa Samsung aynan shu sabab bilan o‘tgan yili barcha smartfonlarini qaytarib olishga majbur bo‘lgan edi. Yangi Fan Edition akkumulyatorining sig‘imi 3200 mA/soatga teng. Bu o‘tgan galgi 3500 mA/soatli sig‘imga ega akkumulyatordan 8,5 foizga kam demakdir. Har bir qurilmadagi akkumulyator sakkiz bosqichlik xavfsizlik tekshiruvidan o‘tgani e’tiborli — ishlab chiqaruvchilar shu orqali yangilangan Note 7’ning sifatiga kafolat bermoqda.
Avvalgisidan nima qoldi?
Galaxy Note (FE) 5,7 dyuymli va Super AMOLED 1440x2560 pikselli displey bilan jihozlangan. Qurilmaga to‘rt yadroli Snapdragon 821 protsessori, shuningdek, Adreno 530 grafik protsessori va 64 gigabaytli ichki xotira bilan 4 Gbli tezkor xotira o‘rnatilgan. Barmoq izi skaneri old panelda joylashgan hamda qurilma IP68 standarti bo‘yicha suv o‘tkazishdan himoyalangan: U 1,5 metr chuqurlikda 30 daqiqa tura oladi.
Galaxy Note 7 FE’ning foydalanuvchi qobig‘i xuddi Samsung Galaxy S8’niki kabi va “Doimo yoniq” funksiyasiga ega.
Sotuvga chiqarilish sanasi va narxi
Samsung Galaxy Note 7 Fan Edition (FE) rasman 7-iyuldan boshlab sotuvga chiqariladi va uning narxi taxminan 610 dollarni tashkil etadi. Ishlab chiqaruvchilar ushbu modeldagi qurilmadan atiga 400 ming dona chiqarishni rejalashtirmoqda, shunday ekan Note 7 FE kuzda chiqishi kutilayotgan Samsung Galaxy Note 8’ning savdosiga raqobat qilmaydi.
Izoh (0)