Samsung Galaxy Note 7 смартфонинг қайта ишланган версияси ишлаб чиқарувчилар томонидан расман тақдим этилди ва сотувга чиқаришга тайёргарлик кўрилмоқда, деб хабар берди «Hi-tech.mail.ru».
Қандай ўзгаришлар бўлди?
Қайта ишланган қурилманинг алоҳида эътиборга молик жиҳатларидан бири бу унинг аккумулятори. Ёдингизда бўлса Samsung айнан шу сабаб билан ўтган йили барча смартфонларини қайтариб олишга мажбур бўлган эди. Янги Fan Edition аккумуляторининг сиғими 3200 мА/соатга тенг. Бу ўтган галги 3500 мА/соатли сиғимга эга аккумулятордан 8,5 фоизга кам демакдир. Ҳар бир қурилмадаги аккумулятор саккиз босқичлик хавфсизлик текширувидан ўтгани эътиборли — ишлаб чиқарувчилар шу орқали янгиланган Note 7’нинг сифатига кафолат бермоқда.
Аввалгисидан нима қолди?
Galaxy Note (FЕ) 5,7 дюймли ва Super AMOLED 1440х2560 пикселли дисплей билан жиҳозланган. Қурилмага тўрт ядроли Snapdragon 821 процессори, шунингдек, Adreno 530 график процессори ва 64 гигабайтли ички хотира билан 4 Гбли тезкор хотира ўрнатилган. Бармоқ изи сканери олд панелда жойлашган ҳамда қурилма IP68 стандарти бўйича сув ўтказишдан ҳимояланган: У 1,5 метр чуқурликда 30 дақиқа тура олади.
Galaxy Note 7 FЕ’нинг фойдаланувчи қобиғи худди Samsung Galaxy S8’ники каби ва «Доимо ёниқ» функциясига эга.
Сотувга чиқарилиш санаси ва нархи
Samsung Galaxy Note 7 Fan Edition (FЕ) расман 7 июлдан бошлаб сотувга чиқарилади ва унинг нархи, тахминан, 610 долларни ташкил этади. Ишлаб чиқарувчилар ушбу моделдаги қурилмадан атига 400 минг дона чиқаришни режалаштирмоқда, шундай экан Note 7 FЕ кузда чиқиши кутилаётган Samsung Galaxy Note 8’нинг савдосига рақобат қилмайди.
Изоҳ (0)