Turizmni rivojlantirish davlat qo‘mitasi raisi Anvar Sharopov boshchiligidagi O‘zbekiston delegatsiyasi Latviyaga tashrif buyurdi. Bu haqda qo‘mita matbuot xizmati xabar bermoqda.
Rigadagi Radisson Blu Daugava mehmonxonasida O‘zbekistonning turizm salohiyati taqdimoti, shuningdek, O‘zbekiston, Latviya, Litva va Estoniya turoperatorlarining B2B shaklidagi uchrashuvlari bo‘lib o‘tdi. Tadbirda Boltiqbo‘yi va Skandinaviya davlatlarining 50 dan ortiq va O‘zbekistonning 5 yetakchi turoperatori ishtirok etdi.
Taqdimot davomida Anvar Sharopov boshchiligidagi delegatsiya a’zolari Latviya iqtisodiyot vaziri A.Asheradens, Latviya sayyohlik agentliklari assotsiatsiyasi boshqaruvchi direktori A.Trupovnitse, Riga shahri meri o‘rinbosari A.Ameriks, Riganing yetakchi universitetlari rahbarlari bilan uchrashuvlar o‘tkazdi.
Ularda o‘zaro manfaatli hamkorlikni yanada rivojlantirish, sayyohlar oqimini ko‘paytirish, turizm infrastrukturasiga investitsiyalar jalb etish, turizm sohasida brending, mutaxassislarni turizmni rivojlantirishning eng zamonaviy dasturlari bo‘yicha o‘qitish, O‘zbekistonning turizm salohiyatini nafaqat Boltiqbo‘yi, balki qo‘shni Skandinaviya davlatlarida ham ilgari surish masalalari muhokama qilindi.
O‘zbekiston va Latviyani “BaltTur” va Toshkent xalqaro turizm yarmarkalari doirasida ikki tomonlama targ‘ib etish bo‘yicha memorandumlar imzolandi.
Izoh (0)