Mo‘ynoq toza ichimlik suvi bilan ta’minlandi

Joriy yilning 1-iyuli sanasi mo‘ynoqliklar uchun yoddan chiqmas sanaga aylandi. Bu haqda “KRuz.uz” xabar bermoqda. 

O‘zbekiston Respublikasi Prezidenti Shavkat Mirziyoyev shu yilning 20—21-yanvar kunlari Qoraqalpog‘istonga tashrifi davomida Qo‘ng‘irot — Mo‘ynoq toza ichimlik suvi tarmog‘i qurilishi bilan tanishgan, 101 kilometrlik suv tarmog‘i ishga tushgach, bir sutkada 7 ming kub metr suv yetkazib berishi va 25 mingdan ortiq aholini toza ichimlik suvi bilan ta’minlashini ta’kidlangandi.

Mo‘ynoq tumani aholisining ko‘p yillardan buyon ushalmay kelayotgan orzusi Prezident tashrifidan so‘ng ruyobga chiqdi. O‘tgan oylar davomida bosh pudratchi —“O‘zbekiston temir yo‘llari” aksiyadorlik jamiyatiga qarashli “Maxsus mexanizatsiyalashgan yo‘l stansiyasi” korxonasi tomonidan 26 milliard so‘mlik ish bajarildi.

1-iyul kuni Qo‘ng‘irot – Mo‘ynoq magistral suv tarmog‘ining ochilish marosimi bo‘lib o‘tdi. O‘zbekiston Respublikasi Bosh vazirining birinchi o‘rinbosari A.Ramatov O‘zbekiston Respublikasi Prezidenti nomidan Mo‘ynoq tumani aholisini toza ichimlik suvi yetib kelgani bilan tabrikladi.

Tadbirda ichimlik suv tarmog‘i qurilish ishlarida faol ishtirok etgan ishchi-xodimlarga qimmatbaho sovg‘alar topshirildi.