АҚШнинг Миннесота штати полицияси YouTube’даги канали учун видеони суратга олиш вақтида севган йигитини отиб қўйган 20 ёшли Монализ Пересни қўлга олди. Бу ҳақда Daily News’га таяниб, Daily Afisha хабар берди.
Педро Руис III ҳомиладор дугонасига каналдаги кузатувчиларини жалб қилиш мақсадида видеотрюк суратга олишни таклиф қилган. «Тасаввур қил, бизнинг 300 минг кузатувчимиз бўлади», — дейди Руис видеода. Бунинг учун у Пересга 50-калибрли жанговар қуролни бериб, ундан китоб орқали ўзига қарата ўқ отишини сўрайди. Ўқ китобни тешиб ўта олмаслигига уни ишонтиради.
Қизнинг терговчиларга сўзлашича, у Руисни бу каби таваккал фикрдан қайтармоқчи бўлган, бироқ у ўз билганидан қолмаган. Оқибатда китобни тешиб ўтган ўқ, жуфтликнинг уч яшар қизининг кўз олдида йигит кўкрагига қадалган. Тез ёрдам ходимлари 22 ёшли америкаликнинг ҳаётини сақлаб қола олмади, унинг жони воқеа жойидаёқ узилган.
Нохуш ҳодиса содир бўлган Крукстон шаҳрининг суди Переснинг етти ойлик ҳомиласи борлигини ҳисобга олиб, унга «қасддан қилинмаган қотиллик» бандининг иккинчи даражаси билан айблов қўйди. Бунда қизга максимал — 10 йил озодликдан маҳрум қилиниш ёки 20 минг доллар миқдорида жарима тўлаш жазоси қўлланилиши мумкин.
Изоҳ (0)