Ўзбекистон Президенти Шавкат Мирзиёев 29 июнь куни Тошкент шаҳрининг Мирзо Улуғбек туманидаги Крантас Group заводига ташриф буюриб, қурилиш учун махсус техника ишлаб чиқарувчи корхоналар фаолияти билан танишди. Бу ҳақда ЎзА хабар бермоқда.
Президент мазкур корхонада ишлаб чиқарилаётган махсус техника воситалари ва ишлаб чиқариш жараёнини кўздан кечираркан, шу соҳага ихтисослашган олий таълим муассасаларида кран ва махсус техникалар ишлаб чиқариш бўйича йилига 20-25 мутахассис тайёрловчи факультетлар очиш ва ёшларни ўқитиш зарурлиги қайд этди.
Аввалроқ Ўзбекистон Президенти Шавкат Мирзиёев Крантас заводига ташрифи давомида махсус техника импортини камайтириш ҳақида топшириқ бергани ҳақида хабар берилган эди.
Маълумот учун, 2008 йилда Тошкент тажриба экспериментал механика заводи негизида ташкил этилган Крантас ва «Кранлар ва махсус техника» корхоналарида ҳозирда 60 турдан зиёд махсус техника, жумладан, автокранлар, кран манипуляторлари, ёнилғи ва кислота ташувчи автотцистерналар, коммунал техника, самосваллар, автоустахоналар, автогидрокўтаргичлар ишлаб чиқарилмоқда.
Корхоналарда 2017—2018 йилларда юк кўтариш қуввати 100 тонна бўлган автокранлар ва кўп қаватли уй-жойлар қурилишига мўлжалланган 8 тонналик минорали кранлар ишлаб чиқариш лойиҳалаштирилган. Шунингдек, экспорт ҳажмини 5 миллион долларга етказиш, Қозоғистон, Тожикистон, Туркманистон, Афғонистон каби давлатларга маҳсулот экспорт қилиш режалаштирилган.
Изоҳ (0)