Sharjadagi oilalardan biri boshpana bergan 70 yoshli amerikalik Alan Kleyr Xayms yaqin orada vataniga qaytishi mumkin. U bilan 230 ming dirham (63 ming dollar atrofida) qarzi tufayli sudlashgan Abu-Dabi universal kasalxonasi da’vosidan voz kechdi. Bu haqda UAE Inside hikoya qilmoqda.
Alan Kleyr Xayms Amirliklarga 2015-yil yanvarida sherigi bilan yangi loyihaga qo‘l urish uchun kelgandi. Loyiha muvaffaqiyatsiz bo‘lib chiqdi va u bor-budidan ayrildi.
Salomatligida muammolar yuzaga kelgan Alan Abu-Dabi kasalxonasiga yotdi va katta miqdorda qarz bo‘lib qoldi. Xarajatlarni qoplash uchun ishga joylashishga harakat qildi, biroq keksaligi pand berdi.
“Biz unga biznes-sherigi hisob-kitob qilishi haqida ishontirilganidan so‘ng ruxsat bergandik. Shundan so‘ng janob Xaymsdan bir yildan ortiq vaqt dom-darak bo‘lmadi. Muqaddas Mariya katolik cherkovi mijozimizning og‘ir ahvoli haqidagi murojaat bilan chiqqach, unga yordam qo‘lini cho‘zishga qaror qildik”, — deydi kasalxona ijrochi direktori Shaber Nellikodu.
Kasalxona qarzidan kechganidan so‘ng Alan Xayms endi vataniga qaytishi mumkin. Kasalxona rahbariyati uning AQShga parvoz xarajatlarini ham qoplab berishni va’da qildi.
Izoh (0)