AQSh ma’muriyatining etika masalalari bo‘yicha byurosi prezident Donald Trampning 2016-yil uchun moliyaviy deklaratsiyasini e’lon qildi. Bu haqda “TASS” xabar bermoqda.
98 varaqdan iborat hujjatda, jumladan, Tramp Vashingtondagi o‘tgan yil sentabrida ishga tushirilgan mehmonxonasidan 19,7 million, Florida shtatidagi “Mar-a-Lago” kurortidan 37,2 million, Nyu-Jersi shtatidagi golf-klubidan 19,8 million dollar daromad olgani ko‘rsatilgan.
Shuningdek, Tramp kitoblari uchun 7 million dollar qalam haqi, AQSh kinoaktyorlar gildiyasidan esa 84 ming dollar pensiya olgan.
Deklaratsiyada Trampning jami 565 ta turli kompaniya va tashkilotdan olgan 288 million dollar miqdoridagi daromadi keltirilgan. Byuro AQSh yetakchisi ularni inauguratsiyasidan bir kun avval tark etganini bildirgan.
AQSh prezidenti 2016-yil yanvaridan joriy yil bahorigacha 1,4 milliard dollar aktiv va 598 million dollar umumiy daromadni deklaratsiya qilgan. Uning qarz majburiyatlari taxminan 315 million dollarni tashkil etdi.
Xususan, Tramp Deutsche Bank’ga 130 million dollar va Ladder Capital Finance investitsiya fondiga ham shuncha miqdorda mablag‘ to‘lab berishi lozim.
Izoh (0)