Toshkent shahar IIBB tomonidan ma’lum qilinishicha, 2017-yil 11-iyun soat, taxminan, 14:00 da Olmazor tumani Shifokorlar dahasida yashovchi Sobir Tohirov 102 raqamiga qo‘ng‘iroq qilgan. Fuqaroning xabar berishicha, ikki nafar noma’lum shaxs pastki qavatdagi qo‘shnilari ekanligini va suv toshib ketganligini bahona qilib, xonadoniga kirib olgan va turmush o‘rtog‘i Nafisa Tohirovaning bo‘yniga noma’lum jism tirab, uyda bo‘lgan besh million so‘mlik taqinchoqlarni bosqinchilik yo‘li bilan olib chiqib ketgan.
Holat yuzasidan dastlabki tergov harakatlari olib borilganda, Nafisa Tohirova turmush o‘rtog‘idan qo‘rqib shu xabarni o‘ylab topgani aniqlandi.
Aslida, bir nafar noma’lum ayol eski buyum va narsalarni olish vaji bilan uyga kirgan. Noma’lum ayol Nafisa Tohirovaga uning farzandlari kasal ekanligini ularga kelayotgan balo-qazolarning oldini olish kerakligini aytgan. Shu tariqa, noma’lum ayol Nafisa Tohirovani aldab, tilla taqinchoqlariga dam solish kerakligini aytib, firibgarlik yo‘li bilan taqinchoqlarga “dam solib”, ularni qo‘lga kiritib, voqea joyidan g‘oyib bo‘lgan.
Berilgan yolg‘on xabar oqibatida firibgar ayol chetda qolib, ichki ishlar xodimlari mavjud bo‘lmagan ikki nafar bosqinchini izlash bilan ovora bo‘lgan.
Izoh (0)