“Ijtimoiy fikr” jamoatchilik fikrini o‘rganish markazi tomonidan o‘tkazilgan navbatdagi sotsiologik tadqiqot so‘nggi yillarda milliy o‘zlik o‘z xalqiga mansubligini his qilish ekanligini anglab yetgan respondentlar soni o‘sganini aniqladi: 2015-yilda bu ko‘rsatkich 22,7 foizni tashkil qilgan bo‘lsa, joriy yilda 33,1 foizga yetdi. Bu haqda “Xalq so‘zi” gazetasi xabar bermoqda.
Tadqiqot o‘z millati va uning tarixidan faxrlanish, Vataniga muhabbat barqaror o‘sib (68,1 foiz) borayotganini ko‘rsatdi. So‘rovda qatnashganlarning yarmidan ko‘pi o‘zini, avvalambor, o‘zbekistonlik, deb hisoblaydi.
So‘rovda ishtirok etganlarning 54,7 foizi “O‘zbekiston tarixini yetarli darajada bilaman”, deb hisoblaydi. O‘z navbatida, respondentlarning 17,7 foizi mamlakat hamda xalqlarning tarixi, madaniyati va ma’naviy merosini o‘rganish maqbul ish, ammo majburiy emas, deb biladi. Lekin bunday fikrda bo‘lgan kishilar safi yildan-yilga kamayib borayapti.
Tadqiqot ishtirokchilarining fikricha, davlat, fuqarolar hamjihatligi kishilarni birlashtiruvchi asosiy omil hisoblanadi (2016-yilda 51,5 foiz, 2006-yilda 40,8 foizni tashkil qilgan). Tadqiqotning avvalgi natijalari bilan qiyoslaganda, dinni birlashtiruvchi omil deb hisoblovchi respondentlar soni barqaror ravishda kamaymoqda. Agar 2006-yilda bu ko‘rsatkich 14,6 foizni tashkil qilgan bo‘lsa, joriy yilda 8,5 foizga yetdi.
So‘rovda qatnashganlarning fikricha, inson huquq va erkinliklarini himoya qilish kafolatlarining kuchaytirilishi, ijtimoiy adolatning ta’minlanishi O‘zbekistonda demokratik qadriyatlarni qaror toptirish, millatlararo totuvlikni mustahkamlashga xizmat qiladi.
Bundan tashqari, mamlakat xavfsizligini ta’minlash (39,5 foiz), jamiyatda ma’naviy-axloqiy muhitni mustahkamlashda odamlar mas’uliyatini kuchaytirish (35,7 foiz), ommaviy axborot vositalarining jamoatchilik fikrini aks ettirishdagi roli (27,2 foiz)ni oshirish kabi omillarning ahamiyati alohida qayd etildi.
Izoh (0)