«Ижтимоий фикр» жамоатчилик фикрини ўрганиш маркази томонидан ўтказилган навбатдаги социологик тадқиқот сўнгги йилларда миллий ўзлик ўз халқига мансублигини ҳис қилиш эканлигини англаб етган респондентлар сони ўсганини аниқлади: 2015 йилда бу кўрсаткич 22,7 фоизни ташкил қилган бўлса, жорий йилда 33,1 фоизга етди. Бу ҳақда «Халқ сўзи» газетаси хабар бермоқда.
Тадқиқот ўз миллати ва унинг тарихидан фахрланиш, Ватанига муҳаббат барқарор ўсиб (68,1 фоиз) бораётганини кўрсатди. Сўровда қатнашганларнинг ярмидан кўпи ўзини, авваламбор, ўзбекистонлик, деб ҳисоблайди.
Сўровда иштирок этганларнинг 54,7 фоизи «Ўзбекистон тарихини етарли даражада биламан», деб ҳисоблайди. Ўз навбатида, респондентларнинг 17,7 фоизи мамлакат ҳамда халқларнинг тарихи, маданияти ва маънавий меросини ўрганиш мақбул иш, аммо мажбурий эмас, деб билади. Лекин бундай фикрда бўлган кишилар сафи йилдан йилга камайиб бораяпти.
Тадқиқот иштирокчиларининг фикрича, давлат, фуқаролар ҳамжиҳатлиги кишиларни бирлаштирувчи асосий омил ҳисобланади (2016 йилда 51,5 фоиз, 2006 йилда 40,8 фоизни ташкил қилган). Тадқиқотнинг аввалги натижалари билан қиёслаганда, динни бирлаштирувчи омил деб ҳисобловчи респондентлар сони барқарор равишда камаймоқда. Агар 2006 йилда бу кўрсаткич 14,6 фоизни ташкил қилган бўлса, жорий йилда 8,5 фоизга етди.
Сўровда қатнашганларнинг фикрича, инсон ҳуқуқ ва эркинликларини ҳимоя қилиш кафолатларининг кучайтирилиши, ижтимоий адолатнинг таъминланиши Ўзбекистонда демократик қадриятларни қарор топтириш, миллатлараро тотувликни мустаҳкамлашга хизмат қилади.
Бундан ташқари, мамлакат хавфсизлигини таъминлаш (39,5 фоиз), жамиятда маънавий-ахлоқий муҳитни мустаҳкамлашда одамлар масъулиятини кучайтириш (35,7 фоиз), оммавий ахборот воситаларининг жамоатчилик фикрини акс эттиришдаги роли (27,2 фоиз)ни ошириш каби омилларнинг аҳамияти алоҳида қайд этилди.
Изоҳ (0)