Тошкент шаҳар ИИББ томонидан маълум қилинишича, 2017 йил 11 июнь соат, тахминан, 14:00 да Олмазор тумани Шифокорлар даҳасида яшовчи Собир Тоҳиров 102 рақамига қўнғироқ қилган. Фуқаронинг хабар беришича, икки нафар номаълум шахс пастки қаватдаги қўшнилари эканлигини ва сув тошиб кетганлигини баҳона қилиб, хонадонига кириб олган ва турмуш ўртоғи Нафиса Тоҳированинг бўйнига номаълум жисм тираб, уйда бўлган беш миллион сўмлик тақинчоқларни босқинчилик йўли билан олиб чиқиб кетган.
Ҳолат юзасидан дастлабки тергов ҳаракатлари олиб борилганда, Нафиса Тоҳирова турмуш ўртоғидан қўрқиб шу хабарни ўйлаб топгани аниқланди.
Аслида, бир нафар номаълум аёл эски буюм ва нарсаларни олиш важи билан уйга кирган. Номаълум аёл Нафиса Тоҳировага унинг фарзандлари касал эканлигини уларга келаётган бало-қазоларнинг олдини олиш кераклигини айтган. Шу тариқа, номаълум аёл Нафиса Тоҳировани алдаб, тилла тақинчоқларига дам солиш кераклигини айтиб, фирибгарлик йўли билан тақинчоқларга «дам солиб», уларни қўлга киритиб, воқеа жойидан ғойиб бўлган.
Берилган ёлғон хабар оқибатида фирибгар аёл четда қолиб, ички ишлар ходимлари мавжуд бўлмаган икки нафар босқинчини излаш билан овора бўлган.
Изоҳ (0)