Toshkent shahri va Toshkent viloyati hokimliklarining yo‘lovchi transporti barcha turlarini litsenziyalash va harakatini muvofiqlashtirish departamentlarini tugatish taklif etilmoqda. Bu O‘zbekiston Respublikasi Prezidentining avtomobil transporti sohasida davlat boshqaruvi tizimini takomillashtirish to‘g‘risidagi qarori loyihasida ko‘zda tutilgan, deya xabar beradi “Gazeta.uz”.
Hujjatda bir-birini takrorlovchi jarayonlar, avtotransport sohasida ishlovchi tadbirkorlarga qo‘yilayotgan cheklov va to‘siqlar bozorning rivojlanishiga xalaqit berayotgani ta’kidlangan. O‘zbekiston avtomobil va daryo transporti agentligi hamda yuqoridagi ikki departament o‘rtasida yo‘lovchilarni avtomobilda tashish uchun litsenziya berish borasidagi nomuvofiqliklar qayd etilgan.
Ularni bartaraf etish uchun Toshkent shahri va Toshkent viloyati hokimliklari departamentlarini agentlikning poytaxt va viloyatdagi boshqarmalari bilan qo‘shib yuborish taklif etilmoqda.
Ushbu departamentlar tomonidan berilgan litsenziyalar va litsenziya kartochkalarini bepul qayta rasmiylashtirib berish rejalashtirilgan.
Shuningdek, O‘zbekiston shaharlaridagi yo‘lovchi transportini boshqarish organlari ham bevosita agentlik oldida hisobdor bo‘lishi ko‘zda tutilmoqda.
Izoh (0)