Jasurbekning o‘qituvchilari: u mushtlashuv keltirib chiqara olmas edi
Ayovsiz kaltaklanish oqibatida vafot etgan Borovskiy nomidagi tibbiyot kolleji talabasi Jasurbek Ibrohimov ta’lim olgan Yunusobod tumanidagi 5-maktab o‘qituvchilari uning janjal chiqarganligi haqidagi xabarlarga nisbatan munosabat bildirdi. Bu haqda UzNews xabar berdi.
O‘g‘ir tan jarohati yetkazishda asosiy gumondor hisoblanayotgan Islombek To‘laganov, shuningdek, uning otasi tomonidan berilgan ko‘rsatmada 3-mayda yuz bergan mushtlashuvni Jasurbek boshlaganligi aytilgan.
Biroq, Jasurbekning o‘qituvchilari bu faktlarga e’tiroz bildirib, ijtimoiy tarmoqlarda o‘zlarining sobiq o‘quvchisiga berilgan tavsifnomani tarqatdi.
Tavsifnomada aytilishicha, Jasurbekning axloqi va o‘zlashtirishiga nisbatan hech qachon tanbeh berilmagan. Jasur og‘ir-bosiq, ochiqko‘ngil va juda mas’uliyatli o‘quvchi bo‘lgan.
UzNews tomonidan keltirilgan tavsifnoma rus tilida bo‘lib, “Daryo” uning o‘zbek tilidagi tarjimasini havola etadi.Yunusobod tumanidagi 5-maktab o‘qituvchilarining arznomasi
5-maktabning pedagogik jamoasi bizning sobiq o‘quvchimiz Ibrohimov Jasurbekning o‘limi bilan bog‘liq ishni sinchkovlik bilan ko‘rib chiqish talabi bilan murojaat qiladi. Barcha o‘qituvchilar internetda paydo bo‘lgan Ibrohimov Jasurbekni salbiy tomondan ko‘rsatib, mushtlashuv keltirib chiqarishga qodir, deb tasvirlangan xabarlardan qattiq g‘azabda.Ko‘pchiligimiz Ibrohimov Jasurbekni yaxshi bilamiz, chunki u ko‘z oldimizda o‘ldimizda o‘sdi. Bu bolaning axloqi va o‘zlashtirishiga nisbatan hech qachon hech qanday e’tiroz bildirilmagan. Jasur og‘ir-bosiq, ochiqko‘ngil va juda mas’uliyatli bo‘lgan.
Quyida Ibrohimov Jasurbekning sinf rahbari, hozirgi vaqtda Rossiya Federatsiyasida yashovchi Filchenko N.A. tomonidan berilgan tavsifnomasi keltiriladi. Bu tavsifnomaga 5-maktabning imzo qo‘yuvchi barcha o‘qituvchilari qo‘shiladi.
5-maktabning 9 “B” sinf bitiruvchisi 1999-yil 11-dekabrda tug‘ilgan Ibrohimov Jasurbek Muhammadjon o‘g‘liga tavsifnoma
Ibrohimov Jasurbek 5-maktabda 5-sinfdan 9-sinfgacha o‘qigan. O‘qish yillari davomida o‘zini qobiliyatli va mas’uliyatli o‘quvchi sifatida ko‘rsata olgan. Barcha fanlar bo‘yicha juda yaxshi o‘qigan, matematika, fizika va kimyoni yoqtirardi. Fan olimpiadalarida ishtirok etgan.Jasurbek tarbiyali, o‘qituvchilar va sinfdoshlariga hurmat bilan munosabatda bo‘lgan. Intizomi yuzasidan hech qachon tanbeh eshitmagan. Tengdoshlari orasida hurmat va obro‘ga sazovor bo‘lgan. O‘quv yillari davomida faqat namunali axloqni namoyon qilgan. Barcha maktab tadbirlarida ishtirok etgan, topshiriqlarga jiddiy yondashgan, mehnatsevar bo‘lgan. Sport bilan shug‘ullangan, jismonan sog‘lom, ma’nan mustahkam, psixologik jihatdan yetuk. Xarakteri og‘ir-bosiq. Jasurbek haqiqiy INSON, ochiqko‘ngil va mehribon.
Jasurbekning ota-onasi uning tarbiyasiga ko‘p e’tibor bergan, uni hamma narsada qo‘llab-quvvatlagan. Oilasida munosabatlar yaxshi.
06.06.2017, Filchenko N.A.
Barcha o‘qituvchilar, o‘quvchilar, sobiq sinfdoshlar, ota-onalar marhumning oilasiga chuqur hamdardlik bildiradi va odil sudlovga umid qiladi.
