Аёвсиз калтакланиш оқибатида вафот этган Боровский номидаги тиббиёт коллежи талабаси Жасурбек Иброҳимов таълим олган Юнусобод туманидаги 5-мактаб ўқитувчилари унинг жанжал чиқарганлиги ҳақидаги хабарларга нисбатан муносабат билдирди. Бу ҳақда UzNews хабар берди.
Ўғир тан жароҳати етказишда асосий гумондор ҳисобланаётган Исломбек Тўлаганов, шунингдек, унинг отаси томонидан берилган кўрсатмада 3 майда юз берган муштлашувни Жасурбек бошлаганлиги айтилган.
Бироқ, Жасурбекнинг ўқитувчилари бу фактларга эътироз билдириб, ижтимоий тармоқларда ўзларининг собиқ ўқувчисига берилган тавсифномани тарқатди.
Тавсифномада айтилишича, Жасурбекнинг ахлоқи ва ўзлаштиришига нисбатан ҳеч қачон танбеҳ берилмаган. Жасур оғир-босиқ, очиқкўнгил ва жуда масъулиятли ўқувчи бўлган.
UzNews томонидан келтирилган тавсифнома рус тилида бўлиб, «Дарё» унинг ўзбек тилидаги таржимасини ҳавола этади.Юнусобод туманидаги 5-мактаб ўқитувчиларининг арзномаси
5-мактабнинг педагогик жамоаси бизнинг собиқ ўқувчимиз Иброҳимов Жасурбекнинг ўлими билан боғлиқ ишни синчковлик билан кўриб чиқиш талаби билан мурожаат қилади. Барча ўқитувчилар интернетда пайдо бўлган Иброҳимов Жасурбекни салбий томондан кўрсатиб, муштлашув келтириб чиқаришга қодир, деб тасвирланган хабарлардан қаттиқ ғазабда.Кўпчилигимиз Иброҳимов Жасурбекни яхши биламиз, чунки у кўз олдимизда ўлдимизда ўсди. Бу боланинг ахлоқи ва ўзлаштиришига нисбатан ҳеч қачон ҳеч қандай эътироз билдирилмаган. Жасур оғир-босиқ, очиқкўнгил ва жуда масъулиятли бўлган.
Қуйида Иброҳимов Жасурбекнинг синф раҳбари, ҳозирги вақтда Россия Федерациясида яшовчи Филченко Н.А. томонидан берилган тавсифномаси келтирилади. Бу тавсифномага 5-мактабнинг имзо қўювчи барча ўқитувчилари қўшилади.
5-мактабнинг 9 «Б» синф битирувчиси 1999 йил 11 декабрда туғилган Иброҳимов Жасурбек Муҳаммаджон ўғлига тавсифнома
Иброҳимов Жасурбек 5-мактабда 5-синфдан 9-синфгача ўқиган. Ўқиш йиллари давомида ўзини қобилиятли ва масъулиятли ўқувчи сифатида кўрсата олган. Барча фанлар бўйича жуда яхши ўқиган, математика, физика ва кимёни ёқтирарди. Фан олимпиадаларида иштирок этган.Жасурбек тарбияли, ўқитувчилар ва синфдошларига ҳурмат билан муносабатда бўлган. Интизоми юзасидан ҳеч қачон танбеҳ эшитмаган. Тенгдошлари орасида ҳурмат ва обрўга сазовор бўлган. Ўқув йиллари давомида фақат намунали ахлоқни намоён қилган. Барча мактаб тадбирларида иштирок этган, топшириқларга жиддий ёндашган, меҳнатсевар бўлган. Спорт билан шуғулланган, жисмонан соғлом, маънан мустаҳкам, психологик жиҳатдан етук. Характери оғир-босиқ. Жасурбек ҳақиқий ИНСОН, очиқкўнгил ва меҳрибон.
Жасурбекнинг ота-онаси унинг тарбиясига кўп эътибор берган, уни ҳамма нарсада қўллаб-қувватлаган. Оиласида муносабатлар яхши.
06.06.2017, Филченко Н.А.
Барча ўқитувчилар, ўқувчилар, собиқ синфдошлар, ота-оналар марҳумнинг оиласига чуқур ҳамдардлик билдиради ва одил судловга умид қилади.
Изоҳ (0)