2011-yil 14-sentabrdagi “Toshkеnt shahri va Toshkеnt viloyatida doimiy propiska qilinishi lozim bo‘lgan shaxslar — O‘zbеkiston Rеspublikasi fuqarolari toifalarining ro‘yxati to‘g‘risida”gi qonun qabul qilinganidan buyon Toshkent shahrida O‘zbekistonning boshqa hududlaridan kelgan 128 171 nafar fuqaro doimiy propiska qilindi.
Bu haqda Toshkent shahar IIBBda 1-iyun kuni bo‘lib o‘tgan brifingda Migratsiya va fuqarolikni rasmiylashtirish boshqarmasi boishlig‘i, podpolkovnik Bekzod Sayfullayev ma’lum qildi.
Shuningdek, 2016-yil avgust oyidan boshlab mamlakatning turli hududlaridan Toshkent shahriga kelgan 217 827 nafar fuqaro poytaxtda turgan joyi bo‘yicha vaqtinchalik hisobga olingan.
Bugungi kunga qadar Toshkent shahrining pasport yoshidagi aholisi 1 669 959 nafari — 98,3 foizi biometrik pasport olgan.
Toshkent shahri bo‘yicha O‘zbekiston fuqaroligini qabul qilish uchun hozirgacha 2024 nafar hamda O‘zbekiston fuqaroligidan chiqish yuzasidan 4568 nafar fuqaroning arizasi ko‘rib chiqilgan. Mazkur arizalar O‘zbekiston Prezidenti Devoni fuqarolik masalalari bo‘yicha komissiyaga taqdim etish uchun O‘zbekiston IIVga yuborilgan.
Prezident Shavkat Mirziyoyevning 2016-yil 20-dekabrdagi farmoniga asosan uch nafar, 2017-yil 22-fevraldagi farmoniga asosan 73 nafar, 21-apreldagi farmoniga binoan 103 nafar Toshkent shahrida doimiy yashovchi, fuqaroligi bo‘lmagan shaxslarga O‘zbekiston fuqaroligi berilgan.
O‘zbekiston fuqarolarining xorijga doimiy ishlashga, sayohatga, o‘qishga, davolanishga, xizmat safariga, vaqtinchalik yashashga chiqish bo‘yicha joriy yilning boshidan buyon poytaxt aholisidan kelib tushgan 41 986 ta ariza o‘rganib chiqilgan.
Shu bilan birga doimiy yashashga chiqish bo‘yicha 99 ta, chet eldan mehmon chaqirish bo‘yicha 834 ta holat hamda O‘zbekistonning xorijiy davlatlarda doimiy yashovchi 354 nafar fuqarosining hujjatlari ko‘rib chiqilgan.
Joriy yilning o‘tgan davri mobaynida Toshkent shahrida 56 612 nafar chet el fuqarolari va fuqaroligi bo‘lmagan shaxs vaqtinchalik ro‘yxatdan o‘tkazilgan.
Toshkent shahrida o‘tkazilgan passport-viza tizimiga oid tekshiruvlar davomida 53 102 nafar O‘zbekiston fuqarosi Ma’muriy javobgarlik to‘g‘risidagi Kodeksning 223-moddasi birinchi qismiga asosan ma’muriy javobgarlikka tortilgan.
Bundan tashqari O‘zbekistonda bo‘lish qoidalarini buzgan 559 nafar chet el fuqarosi va fuqaroligi bo‘lmagan shaxsga ma’muriy bayonnoma rasmiylashtirilgan. Ularning 202 nafari O‘zbekiston hududidan chiqarib yuborilgan.
O‘zbekiston Senati tomonidan 27-mayda tasdiqlangan o‘zgartirishga asosan, Ma’muriy javobgarlik to‘g‘risidagi Kodeksning 223-moddasi birinchi qismiga asosan belgilanadigan jarima miqdori eng kam oylik ish haqining yarim baravaridan uch baravarigacha qilib belgilanadigan bo‘ldi. Mazkur o‘zgartirish matbuotda e’lon qilinganidan so‘ng kuchga kiradi.
2017—2021-yillarga mo‘ljallangan Harakatlar strategiyasida Xorijga chiqish pasportini joriy qilish va xorijga chiqish bo‘yicha stikerni bekor qilish taklifi kiritilgan edi. Bu masala yuzasidan Ichki ishlar vazirligida maxsus ishchi guruh tashkil etilgan. Ishchi guruhda bevosita IIV, TIV va boshqa mutasaddi tashkilotlar bilan hamkorlikda ishlar olib borilmoqda. Ishchi guruhga masala yuzasidan xorijiy tajribalarni o‘rganib, joriy yilning uchinchi choragi yakunigacha taklif tayyorlab, axborot berish vazifasi yuklatilgan.
Izoh (0)