Toshkent—Termiz va G‘uzor—Chim—Ko‘kdala avtoyo‘llari ta’mirlanishi muddati uzaytirildi

O‘zbekiston Prezidenti Shavkat Mirziyoyev qarori bilan Toshkent—Termiz va G‘uzor—Chim—Ko‘kdala avtoyo‘llari ta’mirlanishi bo‘yicha loyihalarning amalga oshirish muddatlari uzaytirildi. Bu haqda Norma xabar bermoqda. 

“Toshkent—Termiz avtoyo‘lini ta’mirlash” loyihasi bo‘yicha (Islom taraqqiyot banki ishtirokida) 35 kilometr masofadagi ishlar to‘liq bajarilgan va 18 ta ko‘prik qurilgan. Qolgan 65 kilometr masofada yo‘l ishlarining bajarilishi 60, ko‘priklar ta’mirida esa 62 foizni tashkil etmoqda. 

Qolgan yo‘l-qurilish ishlari 2018 yil, 21-martga qadar yakunlanishi lozim. Loyihaning amalga oshirilish umumiy muddati 2018-yil 1-oktabrga qadar uzaytirildi. 

“G‘uzor—Chim—Ko‘kdala avtoyo‘lini ta’mirlash” loyihasi (Saudiya taraqqiyot fondi va Kuvayt fondi ishtirokida) 24,8 kilometr yo‘l ishlari bajarilgan, 2 ko‘prik 60 foizga ta’mirlangan, transport chorrahalari qurilishi 90 foizga bajarilgan. 

Mazkur loyiha doirasidagi ishlarni 2018-yil, 1-noyabrgacha tugatish talab etilmoqda. Loyihaning amalga oshirilishi umumiy muddati 2019-yil 1-maygacha uzaytiriladi. 

Qarorda qo‘shimcha muddatlar taqdim etilishi munosabati bilan olingan majburiyatlar o‘z vaqtida bajarilmasligi uchun qat’iy choralar belgilangan.