21-may kuni Toshkentdagi International Hotel mehmonxonasi Rossiyadan tashrif buyurgan taniqli MMA sportchilari ishtirokidagi matbuot-anjumaniga mezbonlik qildi, deb yozdi “Olamsport”.
Unda bir qator sportchilar ishtirok etgan bo‘lsa-da, asosan fanatlar tashrif buyurgan anjumanda savollar Habib Nurmagomedovga berildi.
“Assalomu alaykum. O‘zbekistonga ilk marotaba tashrif buyurdim. Endi Samarqand va Buxoro kabi shaharlarga ham borishni istayman. Bizni iliq kutib olishdi. Juda ko‘p odam yig‘ilgani yoqimli. Buning uchun rahmat!”, — deya so‘z boshlagan Habib Nurmagomedov.
Muvaffaqiyatlar siri
Muvaffaqiyatlar o‘z-o‘zidan paydo bo‘lmaydi. Shuningdek, inson chempion bo‘lib ham tug‘ilmaydi. Buning uchun sportchi birinchi navbatda murabbiyni diqqat bilan eshitishni o‘rganishi kerak. Keyin esa boshqalardan ko‘proq shug‘ullanish lozim.Mashg‘ulotlar ko‘p narsani hal qiladi. Uchinchi sir albatta — sabr. Inson sabrli bo‘lishi lozim! Biz ham o‘z vaqtida jarohat olganmiz, nohaq mag‘lubiyatlarni qabul qilganmiz. Mana shunday voqealardan so‘ng ham kishi o‘z maqsadi yo‘lida davom etishi kerak.
Habib Nurmagomedov, MMA jangchisi
UFC prezidenti Deni Uayt nima uchun Habibga chempionlik janglarini bermaydi?
Chempionlik jangiga osonlikcha erishilmaydi. Buning uchun katta yo‘lni bosib o‘tish kerak. Bunda esa o‘zimning ham aybim bor. Muhim jang oldidan jarohat oldim. Agar barchasi joyida bo‘lsa, yaqin orada chempionlik jangini o‘tkazaman.Sportchining so‘zlariga ko‘ra, shu yilning oktabr oyida navbatdagi jang bo‘lib o‘tadi. Mana shu javobdan keyin muxlisalardan biri savol berish uchun qo‘l ko‘tardi va aslida savoli yo‘qligi haqida aytib, undan dastxat so‘radi. Habib Nurmagomedov qizning iltimosini yerda qoldirmadi va o‘sha yerning o‘zida muxlisasiga dastxat berdi.Habib Nurmagomedov, MMA jangchisi
Konor Makgregor — Floyd Meyvezer jangi haqida berilgan savolga Habib shunday javob qaytardi:
Seni Toni Fergyusonga o‘xshatdim. Chunki u quyosh yo‘q joyda, bino ichida ko‘zoynak taqib yuradi. Savolga kelsam, bu shou jangi bo‘lsa kerak. Bu esa to‘g‘ri emas. Bunday tomoshani sportdan ko‘ra ko‘proq biznesga qiyoslash mumkin.Habib Nurmagomedov, MMA jangchisi
O‘zbekiston boksi haqida
O‘zbekiston eng yaxshi boks mamlakati hisoblanadi. Bu balandparvoz gaplar emas, faktga asoslanib gapiryapman. Men boksni ham kuzatib turaman. Sizlar Olimpiadada eng zo‘r bo‘ldinglar.Men boksda qiynalaman. Masalan, O‘zbekistonning -70 kg vazn toifasidagi bokschisiga qarshi ringga chiqsam, qiynalishim aniq. Kurashda esa nimadir qila olaman. Fikrimcha, bokschilar faqat bokschilar bilan jang qilishi lozim. MMA jangchilari bokschi saviyasida jang qila olmaydi.
Men realistman. Bokschi bilan sparingda nimadir o‘rganishim mumkin. Haqiqiy jang qilishim esa noto‘g‘ri. Men o‘zimga bunday sharmandalikni ravo ko‘rmagan bo‘lardim.
Habib Nurmagomedov, MMA jangchisi
Konor Makgregorni xo‘rozga o‘xshatishlari borasida Habib shunday fikr bildirdi:
Xo‘roz? Hozir uni biroz maqtab yubordingiz. Xo‘rozlar o‘z katagida xo‘jayin hisoblanadi. U xo‘roz emas, tovuq!Habib Nurmagomedov, MMA jangchisi
Toshkentda MMA klubi ochish haqida
Men O‘zbekistonni boks mamlakati deb hisoblayman. Bu yerda aynan shu narsani muhokama qilamiz. Ishonamanki, sizlarda ham bo‘lajak yulduzlar ko‘p.Habib Nurmagomedov, MMA jangchisi
“Sizni o‘zim ishlaydigan restoranga taklif qilmoqchiman. Sheriklaringiz bilan kelsangiz, xursand bo‘lardim”, — dedi muxlislardan biri. Ma’lum bo‘lishicha, uning restorani italyancha. Habib esa O‘zbekistonga italyancha ovqat yegani emas, palov yeyish uchun kelgani haqida aytgan.
“Matbuot anjumani yakunlanganidan so‘ng sportchi va muxlislar ishtirokida fotosessiya o‘tkazildi. Sportchi eng yaxshi uchta savol egasiga o‘zi bilan olib kelgan futbolkalarni taqdim etmoqchi edi. Afsuski, muxlislik madaniyati borasida qilinishi lozim bo‘lgan ishlar ko‘p. Bu haqida alohida gaplashamiz”, — deb “Olamsport” muxbiri maqolani yakunlagan.
Ma’lumot uchun, O‘zbekiston jui-jitsu federatsiyasi tomonidan tashkil qilingan tadbirda Habib Nurmagomedovdan tashqari Zubayra Tuxugov, Islom Maxachev, Abubakr Nurmagomedov va Islam Mamedov kabi sportchilar ishtirok etdi.
Izoh (0)