21 май куни Тошкентдаги International Hotel меҳмонхонаси Россиядан ташриф буюрган таниқли MMA спортчилари иштирокидаги матбуот-анжуманига мезбонлик қилди, деб ёзди «Оламспорт».
Унда бир қатор спортчилар иштирок этган бўлса-да, асосан фанатлар ташриф буюрган анжуманда саволлар Ҳабиб Нурмагомедовга берилди.
«Ассалому алайкум. Ўзбекистонга илк маротаба ташриф буюрдим. Энди Самарқанд ва Бухоро каби шаҳарларга ҳам боришни истайман. Бизни илиқ кутиб олишди. Жуда кўп одам йиғилгани ёқимли. Бунинг учун раҳмат!», — дея сўз бошлаган Ҳабиб Нурмагомедов.
Муваффақиятлар сири
Муваффақиятлар ўз-ўзидан пайдо бўлмайди. Шунингдек, инсон чемпион бўлиб ҳам туғилмайди. Бунинг учун спортчи биринчи навбатда мураббийни диққат билан эшитишни ўрганиши керак. Кейин эса бошқалардан кўпроқ шуғулланиш лозим.Машғулотлар кўп нарсани ҳал қилади. Учинчи сир албатта — сабр. Инсон сабрли бўлиши лозим! Биз ҳам ўз вақтида жароҳат олганмиз, ноҳақ мағлубиятларни қабул қилганмиз. Мана шундай воқеалардан сўнг ҳам киши ўз мақсади йўлида давом этиши керак.
Ҳабиб Нурмагомедов, MMA жангчиси
UFC президенти Дени Уайт нима учун Ҳабибга чемпионлик жангларини бермайди?
Чемпионлик жангига осонликча эришилмайди. Бунинг учун катта йўлни босиб ўтиш керак. Бунда эса ўзимнинг ҳам айбим бор. Муҳим жанг олдидан жароҳат олдим. Агар барчаси жойида бўлса, яқин орада чемпионлик жангини ўтказаман.Спортчининг сўзларига кўра, шу йилнинг октябрь ойида навбатдаги жанг бўлиб ўтади. Мана шу жавобдан кейин мухлисалардан бири савол бериш учун қўл кўтарди ва аслида саволи йўқлиги ҳақида айтиб, ундан дастхат сўради. Ҳабиб Нурмагомедов қизнинг илтимосини ерда қолдирмади ва ўша ернинг ўзида мухлисасига дастхат берди.Ҳабиб Нурмагомедов, MMA жангчиси
Конор Макгрегор — Флойд Мейвезер жанги ҳақида берилган саволга Ҳабиб шундай жавоб қайтарди:
Сени Тони Фергюсонга ўхшатдим. Чунки у қуёш йўқ жойда, бино ичида кўзойнак тақиб юради. Саволга келсам, бу шоу жанги бўлса керак. Бу эса тўғри эмас. Бундай томошани спортдан кўра кўпроқ бизнесга қиёслаш мумкин.Ҳабиб Нурмагомедов, MMA жангчиси
Ўзбекистон бокси ҳақида
Ўзбекистон энг яхши бокс мамлакати ҳисобланади. Бу баландпарвоз гаплар эмас, фактга асосланиб гапиряпман. Мен боксни ҳам кузатиб тураман. Сизлар Олимпиадада энг зўр бўлдинглар.Мен боксда қийналаман. Масалан, Ўзбекистоннинг -70 кг вазн тоифасидаги боксчисига қарши рингга чиқсам, қийналишим аниқ. Курашда эса нимадир қила оламан. Фикримча, боксчилар фақат боксчилар билан жанг қилиши лозим. MMA жангчилари боксчи савиясида жанг қила олмайди.
Мен реалистман. Боксчи билан спарингда нимадир ўрганишим мумкин. Ҳақиқий жанг қилишим эса нотўғри. Мен ўзимга бундай шармандаликни раво кўрмаган бўлардим.
Ҳабиб Нурмагомедов, MMA жангчиси
Конор Макгрегорни хўрозга ўхшатишлари борасида Ҳабиб шундай фикр билдирди:
Хўроз? Ҳозир уни бироз мақтаб юбордингиз. Хўрозлар ўз катагида хўжайин ҳисобланади. У хўроз эмас, товуқ!Ҳабиб Нурмагомедов, MMA жангчиси
Тошкентда MMA клуби очиш ҳақида
Мен Ўзбекистонни бокс мамлакати деб ҳисоблайман. Бу ерда айнан шу нарсани муҳокама қиламиз. Ишонаманки, сизларда ҳам бўлажак юлдузлар кўп.Ҳабиб Нурмагомедов, MMA жангчиси
«Сизни ўзим ишлайдиган ресторанга таклиф қилмоқчиман. Шерикларингиз билан келсангиз, хурсанд бўлардим», — деди мухлислардан бири. Маълум бўлишича, унинг ресторани италянча. Ҳабиб эса Ўзбекистонга италянча овқат егани эмас, палов ейиш учун келгани ҳақида айтган.
«Матбуот анжумани якунланганидан сўнг спортчи ва мухлислар иштирокида фотосессия ўтказилди. Спортчи энг яхши учта савол эгасига ўзи билан олиб келган футболкаларни тақдим этмоқчи эди. Афсуски, мухлислик маданияти борасида қилиниши лозим бўлган ишлар кўп. Бу ҳақида алоҳида гаплашамиз», — деб «Оламспорт» мухбири мақолани якунлаган.
Маълумот учун, Ўзбекистон жуи-жицу федерацияси томонидан ташкил қилинган тадбирда Ҳабиб Нурмагомедовдан ташқари Зубайра Тухугов, Ислом Махачев, Абубакр Нурмагомедов ва Ислам Мамедов каби спортчилар иштирок этди.
Изоҳ (0)