“Toshshahartransxizmat” AJning yangi rahbariyati 13–14-may kunlari poytaxt avtobus parklari rahbarlari bilan o‘tkazilgan uchrashuvlar chog‘ida ularning oldiga qator vazifalar qo‘ydi, deb xabar beradi AJ matbuot xizmati.
“X. Xalmatov raisligida 2017-yilning 13 va 14-may kunlari jamiyat tarkibidagi barcha korxonalar rahbarlari, mutasaddi xodimlari va yo‘lovchi tashuvchi yo‘nalishlar sardorlari ishtirokida kengaytirilgan yig‘ilishlar o‘tkazildi, — deyiladi xabarnomada.
Qo‘yilgan vazifalardan biri aholidan kelib tushayotgan ariza va shikoyatlardan kelib chiqib, avtobuslarning tasdiqlangan ish rejimi va tasdiqlangan jadval bo‘yicha, ya’ni ertalab soat 04:30 dan boshlab soat 00:00 gacha ishlashini ta’minlash bo‘ldi.
Bundan tashqari, galdagi vazifalar sifatida quyidagilar belgilab olindi:
yo‘lovchi tashish transportida xavfsizlikni ta’minlash;
aholining yo‘lovchi tashishga bo‘lgan ehtiyojini to‘liq qondirish;
yo‘nalishlarda avtobuslar muntazamligini ta’minlash;
nosoz avtobuslarni zudlik bilan ta’mirlash va ulardan yo‘lovchi tashishda samarali foydalanish;
avtokorxonalardagi barcha ishchi-xodimlarning, shu jumladan, farrosh, chilangar, haydovchilar va chiptachilarning oylik maoshini oshirish va ularni mehnatiga qarab munosib rag‘batlantirishni ta’minlash;
haydovchi va chiptachilarning yo‘lovchilarga bo‘lgan muomala madaniyatini yuksaltirish;
haydovchilarga qulay mehnat sharoitini yaratish, ularga eng qulay va sifatli materiallardan kiyim-bosh tiktirish.
Izoh (0)