“Paxtakor” klubi Toshkent shahar hokimidan Bobur Shodiyevning qo‘liga o‘tdi

Toshkentning “Paxtakor” klubi rahbariyatida yana o‘zgarish ro‘y berdi, deb ma’lumot berdi jamoa matbuot xizmati.

Unga ko‘ra, yaqindagina “Paxtakor” vitse-prezidenti etib tayinlangan Bobur Shodiyev endilikda klub prezidenti lavozimini egalladi. Bunga qadar shu vazifani bajarib kelgan Toshkent shahar hokimi Rahmonbek Usmonov esa “Paxtakor”ning faxriy prezidentiga aylandi.

Bobur Shodiyev vitse-prezident bo‘lgach, “Paxtakor” bosh direktori vazifasida ish boshlagan Umid Ahmadjonov endilikda vitse-prezident lavozimida ishlashga kirishdi. Uning eski o‘rnida Dmitriy Adisman bosh direktorlik vazifasini bajaradi.

“Paxtakor” rahbariyatidagi o‘zgarishlar vaqtida klub stadioni zamonaviy ko‘rinishda qayta ta’mirdan chiqarilishi va jamoaga Yevropa yoki Braziliyadan mutaxassis olib kelinishi mumkinligi xabar qilingandi.

Toshkent grandi ikkinchi davra oldidan “Lokomotiv”ga ijaraga berilgan Jaloliddin Masharipov hamda faoliyatini Xitoyda davom ettirayotgan Yegor Krimetsni ortga qaytarish harakatiga tushgani aytilgandi.