Sankt-Peterburg metrosida uyushtirilgan terrorchilik harakatiga aloqadorlikda gumon qilinayotgan Abror va Akram Azimovlarning Rossiya fuqaroligi ularning otasiniki bilan birga bekor qilindi, deya xabar bermoqda “Kommersant”.
Rossiya Ichki ishlar vazirligi rasmiy vakili Irina Volkning ma’lum qilishicha, aka-uka Azimovlarning otasi fuqarolik olish vaqtida yolg‘on ma’lumotlar bergan, shu sababli ularning fuqaroligi bekor qilingan.
Avvalroq terakt ijrochisi Akbarjon Jalilovning Rossiya fuqaroligi bekor qilingani ma’lum bo‘lgan edi. Uning otasi ham fuqarolik olish vaqtida yolg‘on axborot bergan — xotini va bolasi borligini yashirgan.
Sankt-Peterburg metrosining “Sennaya ploshchad” va “Texnologicheskiy institut” bekatlari oralig‘idagi portlash 3-aprel kuni yuz bergan edi. Vagondagi portlash oqibatida hozirga qadar 16 kishi, jumladan, terakt ijrochisining o‘zi halok bo‘ldi.
18-aprel kuni Moskva shahar Basmanniy tuman sudi terakt tashkilotchisi deb gumon qilinayotgan asli qirg‘izistonlik Abror Azimovni hibsga olish haqida qaror chiqardi, ko‘p o‘tmay uning akasi — Akram Azimov qo‘lga olindi.
Ma’lumotlarga ko‘ra, Akram Azimov Turkiyadan pul olib, terrorchilarni moliyalashtirgan, shuningdek, ularni soxta hujjatlar bilan ta’minlagan.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)