Санкт-Петербург метросида уюштирилган террорчилик ҳаракатига алоқадорликда гумон қилинаётган Аброр ва Акрам Азимовларнинг Россия фуқаролиги уларнинг отасиники билан бирга бекор қилинди, дея хабар бермоқда «Коммерсантъ».
Россия Ички ишлар вазирлиги расмий вакили Ирина Волкнинг маълум қилишича, ака-ука Азимовларнинг отаси фуқаролик олиш вақтида ёлғон маълумотлар берган, шу сабабли уларнинг фуқаролиги бекор қилинган.
Аввалроқ теракт ижрочиси Акбаржон Жалиловнинг Россия фуқаролиги бекор қилингани маълум бўлган эди. Унинг отаси ҳам фуқаролик олиш вақтида ёлғон ахборот берган — хотини ва боласи борлигини яширган.
Санкт-Петербург метросининг «Сенная плошчад» ва «Технологический институт» бекатлари оралиғидаги портлаш 3 апрель куни юз берган эди. Вагондаги портлаш оқибатида ҳозирга қадар 16 киши, жумладан, теракт ижрочисининг ўзи ҳалок бўлди.
18 апрель куни Москва шаҳар Басманний туман суди теракт ташкилотчиси деб гумон қилинаётган асли қирғизистонлик Аброр Азимовни ҳибсга олиш ҳақида қарор чиқарди, кўп ўтмай унинг акаси — Акрам Азимов қўлга олинди.
Маълумотларга кўра, Акрам Азимов Туркиядан пул олиб, террорчиларни молиялаштирган, шунингдек, уларни сохта ҳужжатлар билан таъминлаган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)