Shavkat Mirziyoyev Malikobod mahallasida sumalak tayyorlayotgan onaxonlar bilan samimiy suhbat qurdi

Navoiy viloyatidagi “Vang‘ozi agro” fermer xo‘jaligining shiyponida Malikobod mahallasining onaxonlari sumalak tayyorladi.

O‘zAning xabar berishicha, O‘zbekiston Prezidenti Shavkat Mirziyoyev ular bilan ijtimoiy-iqtisodiy islohotlar odamlar hayotida qanday aks etayotgani, xotin-qizlar turmushini farovon qilish, farzandlar ta’lim-tarbiyasi to‘g‘risida samimiy suhbat qurdi.

Malikobod mahallasida yashovchi Jumagul Fayzullayeva barcha islohotlardan avvalo odamlar manfaat ko‘rayotgani, O‘zbekistondagi o‘zgarishlar xalqning ertangi kunga ishonchini mustahkamlayotganini faxr bilan ta’kidladi.

Odamlarning quvonchi, ertasiga ishonchi oilasidagi hayot tarzi, turmush darajasiga bog‘liq. Bizga shu ham bo‘laveradi, degan qarash bilan yashash vaqti allaqachon o‘tdi. Uyida daromad topgan, farzandlarini ham shu ruhda o‘stirgan oila o‘zining farovonligiga zamin yaratadi. Davlatimiz tomonidan amalga oshirilayotgan islohotlardan maqsad odamlarga yelkadosh bo‘lish, farzandlarining baxti-kamolini ko‘rishi uchun barcha imkoniyatlarni yaratishdir.

Shavkat Mirziyoyev, O‘zbekiston Prezidenti