Amu—Buxoro kanali ustida barpo etilgan yangi ko‘prik foydalanishga topshirildi

Buxoro viloyatida O‘zbekiston milliy avtomagistrali tizimidagi Qorovulbozor tumani orqali o‘tuvchi “G‘uzor – Buxoro – Nukus – Beyneu” xalqaro yo‘lidagi viloyatlararo Amu—Buxoro mashina kanali ustida barpo etilgan yangi ko‘prik foydalanishga topshirildi, deya xabar qiladi O‘zA.

Investitsiya dasturiga kirgan ushbu obyektda “Qashqadaryo ko‘prik xo‘jalik ixtisoslashtirilgan saqlash ta’mirlash va foydalanish” boshqarmasi jamoasi tomonidan 11,8 milliard so‘mlik qurilish-montaj ishlari bajarildi.

Ko‘prik avvalgisiga nisbatan uch barobar keng bo‘lib, eni 27, uzunligi 72 metrni tashkil etadi. To‘rt polosali yo‘ldagi yangi ko‘prikning o‘tkazish qobiliyati, harakat xavfsizligini ta’minlash darajasi keskin oshdi. Inshootning ikki tomonida piyodalar uchun yo‘laklar barpo etilgan.

Xalqaro ahamiyatdagi ushbu avtomobil yo‘lini rekonstruksiya qilish ishlari davom ettiriladi. Investitsiya dasturi doirasida yangi ko‘prikning ikki tomonidagi avtotrassaning 5 kilometrlik qismi qayta quriladi.

Sh.Egamov, “Buxoroavtoyo‘l” hududiy yo‘llardan foydalanish tashkiloti direktori o‘rinbosari