Madridning “Real” klubini Ispaniya kubogidan chiqarib yuborgan “Selta” yarim finalda “Alaves”ga gol ura olmadi

Ispaniya kubogining finalida to‘p surish uchun harakat qilayotgan Vigoning “Selta” klubi yarim finalning o‘z maydonida kechgan birinchi o‘yinida La liga debyutanti “Alaves”ni taslim qila olmadi — 0:0.

Vaholanki vigolik futbolchilar chempionlik uchun asosiy da’vogar hisoblangan Madridning “Real” klubini turnirdan chiqarib yuborgandi. “Qirollik klubi” darvozasiga har ikki o‘yinda ham gol urgan “Selta”, “Alaves” postini ishg‘ol qila olmadi.

Avvalroq Kataloniyaning “Barselona” klubi yarim finalning ilk o‘yinini Madriddagi “Visente Kalderon” stadionida o‘tkazib, “Atletiko” ustidan 2:1 hisobida zafar quchishga muvaffaq bo‘lgandi.

Ispaniya kubogi Yarim final 2-fevral, payshanba

“Selta” — “Alaves” 0:0

Ma’lumot uchun, “Kamp Nou”da bo‘lib o‘tadigan “Barselona” va “Atletiko” klublari ishtirokidagi javob o‘yini 7-fevral kuniga tayin qilingan. “Selta” esa “Alaves” maydoniga 8-fevralda tashrif buyuradi.