Dastlabki ma’lumotlarga ko‘ra, O‘zbekistonda MAN avtobuslarini ishlab chiqarish joriy yildan boshlanadi. Bu haqda, “Gazeta.uz”ning yozishicha, “Toshshahartransxizmat” kompaniyasi rahbari, Toshkent shahar hokimi o‘rinbosari Otabek Sodiqov jurnalistlarga ma’lum qilgan.
“Mazkur loyiha bo‘yicha mamlakat hukumati qarori qabul qilinishi kutilmoqda”, — dedi “Toshshahartransxizmat” rahbari.
Otabek Sodiqovning so‘zlariga ko‘ra, hozircha 5 dona MAN avtobusi tayyor, 2017-yil oxiriga qadar yana 50 dona shunday avtobus tayyor bo‘lishi lozim.
2015-yilning aprelida Toshkent ko‘chalarida siqilgan tabiiy gazda harakatlanuvchi MAN Lion’s CNG avtobusi paydo bo‘lgan edi. Avtobus o‘sha yilning sentabriga qadar Toshkentda sinovdan o‘tkazilgan, shundan so‘ng avtobus yo‘nalishlaridan biriga biriktirilgan edi.
2015-yil oxirida Samarqandda ishlab chiqariladigan MAN Lion’s CNG avtobusi Bus Euro Test tanlovida “Yil avtobusi” deb topilgani haqida xabar berilgan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)