Toshkentda tramvaylar harakatini qayta yo‘lga qo‘yish borasida hozircha hech qanday gap-so‘z yo‘q. Bu haqda “Toshshahartransxizmat” kompaniyasi boshqaruv raisi, poytaxt hokimi o‘rinbosari Otabek Sodiqov jurnalistlar bilan uchrashuvda ma’lum qildi, deya xabar bermoqda “Gazeta.uz”.
“Toshkentda tramvaylar harakati qayta yo‘lga qo‘yiladimi, degan savolga javob berar ekan, Otabek Sodiqov bu borada hozircha hech qanday so‘z bormayotganini ta’kidladi. Ayni paytda, 2030-yilgacha shaharning yagona transport tizimi doirasida poytaxt atrofi bo‘ylab elektr poyezdi halqa yo‘li qurilishini eslatib o‘tdi”, — deyiladi “Gazeta.uz” xabarida.
Toshkent shahrida tramvaylar harakati 2016-yil mayida to‘la to‘xtatilgan, yil davomida shahardagi aksariyat asosiy tramvay yo‘llari demontaj qilindi. Shaharda tramvay harakati bundan 115 yil avval yo‘lga qo‘yilgan va 2016-yil mayiga qadar uzluksiz ishlab kelayotgan edi.
2016-yil oktabrida Samarqandda tramvay qatnovini yo‘lga qo‘yish tashabbusi o‘rtaga tashlandi. Hozirda shaharda tramvay yo‘lining dastlabki qismi qurilmoqda. U 2017-yilning martida foydalanishga topshirilishi kutilmoqda. 2011—2012-yillarda Toshkent uchun Chexiyadan sotib olingan oltita Vario LF tramvaylari ham hozirda Samarqandga yetkazilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)