Meksika prezidenti Enrike Penya Nyeto 31-yanvar kuni Vashingtonda o‘tkazilishi lozim bo‘lgan AQSh prezidenti Donald Tramp bilan uchrashuvini bekor qildi, deya xabar bermoqda Meduza.
“Kelasi seshanbaga rejalashtirilgan AQSh prezidenti bilan ishchi uchrashuvda men bo‘lmasligim haqida bugun tongda Oq uyga ma’lum qildik”, — deb yozdi Meksika prezidenti Twitter’dagi sahifasida.
Bundan bir necha soat avvalroq Tramp Twitter’dagi sahifasida, agar Meksika “o‘zi uchun juda zarur bo‘lgan devor uchun haq to‘lashni istamasa”, uchrashuvni bekor qilgan ma’qulligi haqida xabar yozib qoldirgan edi.
Donald Tramp 25-yanvar kuni noqonuniy muhojirlikka qarshi kurash doirasida Meksika bilan chegarada devor qurish to‘g‘risidagi farmonni imzoladi. AQSh prezidentining qayd etishicha, devor qurilishi u yoki bu shaklda Meksika tomonidan moliyalashtiriladi. Meksika rahbariyati esa buning hech qanaqasiga imkoni yo‘qligini ta’kidlab kelmoqda.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)