Janubiy koreyaliklarning deyarli yarmi, favqulodda zarurat bo‘lgan taqdirda, KXDRga oldindan zarba berilishini yoqlaydi. “Asan” siyosiy tadqiqotlar instituti 26-yanvar, payshanba kuni e’lon qilgan ijtimoiy o‘rganishlar natijasi shundan dalolat bermoqda, deya xabar beradi “TASS”.
“Respondentlarning 43,2 foizi o‘ta zarurat tug‘ilgan taqdirda Shimolga oldindan zarba berish g‘oyasini quvvatlaydi. Ular bu harakatlar hatto to‘laqonli urushga olib kelgan taqdirda ham zarbalarni yoqladi. So‘rov qatnashchilarini 50,1 foizi bunga qarshi chiqdi”, — deyiladi hisobotda.
Tadqiqotchilar KXDRga qarshi murosasiz choralar tarafdorlari ko‘payganini qayd etmoqda. 2013-yilda o‘tkazilgan shunday so‘rov davomida zarbalar berilishini ishtirokchilarning 36,3 foizi ma’qullagan, 59,1 foizi esa qarshi bo‘lgandi.
Janubiy Koreya o‘z atom bombasiga ega bo‘lishini respondentlarning 60 foizi yoqladi, 61 foizi esa mamlakatda AQSh yadro quroli joylashtirilishini ma’qul topdi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)