Janubiy Koreya Konstitutsiyaviy sudi rahbari impichment bo‘yicha qarorni 13-martgacha qabul qilishga chaqirdi

Koreya Respublikasi prezidentiga nisbatan impichmentni mamlakat Konstitutsiyaviy sudida tasdiqlash bo‘yicha ish 13-martga qadar yakunlanishi kerak. Bunday da’vat bilan Konstitutsiyaviy sud rahbari Pak Xan Chxol chiqish qildi, deb yozadi “TASS”.

Rais eslatishicha, uning vakolatlari muddati shu yilning 31-yanvarida tugaydi, sudyalardan yana biri esa 13-martda iste’foga chiqadi. Pak Kin Xening ishi bo‘yicha qaror qabul qilish uchun Konstitutsiyaviy sudning to‘qqiz sudyasidan olti nafarining ovozi kerak.

“Hukm shiddatli munozaralardan keyin chiqariladi, shuning uchun to‘qqiz sudyaning har birining ovozi o‘ta muhim, — dedi Pak Xan Chxol. — Ulardan biri yoki ikkisi ishtirok etmasa, noto‘g‘ri qaror chiqarilishi mumkin”. “Aynan shuning uchun Pak Kin Xening ishi 13-martgacha ko‘rib chiqilishi kerak”, — deya xulosa qildi u.