Samsung Electronics kompaniyasi portlash xavfi bo‘lgan Galaxy Note 7 flagman smartfonlarini qaytarib olish jarayonini yakunlashiga oz qoldi, deb yozadi 3DNews. Natijada aeroportlarda yo‘lovchilarni samolyot bortida qurilmalardan foydalanish mumkin emasligi haqida ogohlantirmay qo‘yishdi.
Samsung bayonotiga ko‘ra, ayni paytga qadar Galaxy Note 7 foydalanuvchilari ushbu telefonlarning 96 foizini qaytarib bergan. Qurilmalarning qolgan 4 foizini qaytarish yaqin haftalar ichida rejalashtirilmoqda.
Ushbu xabardan so‘ng AQSh Fuqarolar aviatsiyasi federal boshqarmasi yo‘lovchilarni samolyotlarda Galaxy Note 7’ni yoqish va ayniqsa, uni zaryadlash taqiqlanishi haqida ogohlantirish talabini bekor qildi.
Eslatib o‘tamiz, Galaxy Note 7 smartfonlari 2016-yil 19-avgustdan sotila boshlagan edi. Sentabr boshida Samsung barcha sotilgan Galaxy Note 7’larni qaytarib olishini, yana bir oydan keyin esa mahsulotni ishlab chiqarish va sotish to‘xtatilganini e’lon qildi.
Izoh (0)