Koreya Respublikasi hukumati Berlin va Anqaradagi hujumlardan keyin mamlakatda terrorchilik xavfi oshganini ma’lum qildi, deb yozadi “TASS”.
22-dekabr, payshanba kuni bo‘lib o‘tgan hukumat kengashida ogohlikni oshirib, ommabop jamoat joylarida hujumlar oldini olishga qaratilgan qator chora-tadbirlarni tayyorlash haqida qaror qabul qilindi.
Xususan, birinchi navbatda hukumat mamlakatning chet eldagi fuqarolarini o‘zlarini hujumlardan asrash yo‘llaridan xabardor qiladi. Bundan tashqari, respublikaning Seul va Pusan kabi yirik shaharlarida aksilterrorchilik organlari majlislari bo‘lib o‘tadi.
Kengash chog‘ida, shuningdek, ijtimoiy tarmoqlarda IShID terrorchilik guruhi tomonidan olib borilayotgan faol targ‘ibotchilik faoliyatiga qarshi kurashish zarurligi aytib o‘tildi.
19-dekabr kuni G‘arbiy Berlinning markaziy qismida Rojdestvo yarmarkasi bo‘lib o‘tayotgan hududga yuk mashinasi bostirib kelgan, natijada 12 kishi qurbon bo‘lib, 48 kishi yaralangan edi.
Shu kuniyoq Anqaradagi ko‘rgazma ochilishida Rossiyaning Turkiyadagi elchisi Andrey Karlov o‘ldirildi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)