BMT bosh kotibi Pan Gi Mun Janubiy Koreyadagi muddatidan oldin prezidentlik saylovlarida ishtirok etishi mumkin. Bu haqda u 21-dekabr, chorshanba kuni Nyu-Yorkda, Janubiy koreyalik jurnalistlar bilan uchrashuvi chog‘ida ma’lum qildi, deya xabar beradi “TASS”.
“Agar BMT bosh kotibi lavozimidagi 10 yillik tajribam Janubiy Koreyani rivojlantirishga yordam bersa, bu maqsadga erishish uchun o‘zimni qurbon qilishga tayyorman. Prezidentlik saylovida ishtirok etish masalasida mamlakat fuqarolarining fikrini bilgandan so‘ng uzil-kesil bir to‘xtamga kelaman”, — deya ta’kidladi Pan Gi Mun.
Shuningdek, Pan Gi Mun 31-dekabrda lavozimini tark etganidan so‘ng kelgusi yil yanvari o‘rtalarida Seulga qaytish niyatida ekanligini ma’lum qildi.
Janubiy Koreyaning amaldagi prezidenti Pak Kin Xeni lavozimidan chetlatish jarayoni parlamentdagi impichment bo‘yicha ovoz berish natijalari Konstitutsiyaviy sud tomonidan tasdiqlanganidan so‘ng yakuniga yetadi. Buni 6 oy mobaynida amalga oshirishi lozim bo‘lgan sud parlament qarorini tasdiqlasa, mamlakatda muddatidan oldin prezidentlik saylovlari o‘tkaziladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)